«Կադրային փոփխությունները կապված են այն թեմաների հետ, որոնք, այսպես թե այնպես հրապարակայնորեն քննարկվում են․․․ Տվյալ շրջանի պաշտոնանկությունները ոչ թե անձնավորված են, այլ ավելի շատ համակարգերի հետ են կապված։ Այդ կադրային փոփոխություններն իրենց բնույթով ոչ թե կոնֆլիկտային են, այլ աշխատանքային են»,- այս մասին այսօր «Հանրային հեռուստատեսության» եթերում նշեց ՀՀ վարչապետ Նիկոլ Փաշինյանը՝ պարզաբանելով, թե ինչու է «իր համբերության բաժակը լցվել» և թե ինչու են տեղի ունեցել պաշտոնանկություններ։

Փաշինյանը նշեց, որ գնահատում է պաշտոնանկ արված պաշտոնյաների կատարած աշխատանքը․ «Մեր գործընկերները համակարգային շատ լուրջ փոփոխություններ են իրականացրել, այո, այդ առումով, լավ էին աշխատում»։

«Իմ ընկալմամբ՝ ղեկավար պաշտոնյան մի կողմից պետք է համակարգը առաջնորդի, և այդ առումով լինի համակարգի մաս, իսկ որոշ առումով պետք է որոշակի տարանջատվածություն ունենա համակարգից, որպեսզի կարողանա հենց համակարգը տեսնել կողքից և հետագա համակարգային փոփոխությունն իրականացնել։ Պետական կառավարման համակարգում լինում է, որ գալիս է մի պահ, որ այդ փոփոխությունները բերող առաջնորդները իքս պահից դառնում են հենց համակարգի մաս, այսինքն, բարեփոխումների պրոցեսը հնարավոր չի դառնում․․․ Որպեսզի համակարգը փոխենք, պետք է համակարգի թերությունները տեսնենք․․․ Հայացքի սրությունը կարող է կորչել։ Ինձ հետ էլ է լինում, որ թերությունները տեսնելով, այնուամենայնիվ, կտրուկ գործողություններից մի իքս պահի սկսում ենք խուսափել։ Դա հասկանալի, բայց երբեմն ոչ օգտակար գործելակերպ է»,- պարզաբանեց Փաշինյանը։

***

«Հանրային հեռուստաընկերությանը» տված հարցազրույցում Նիկոլ Փաշինյանը նշեց. «Ուզում եմ մի գաղտնիք բացել: Վերջին շրջանում, կներեք, որ Հայաստանում անկախ դատական համակարգ չկա, կամ մարդկանց ընկալումն է այդպիսին: Մարդկանց որ հարցնենք, նա ո՞վ է դրա պատասխանատուն: Մարդիկ ո՞ւմ անունն են տալու: Իմ անունն են, չէ ,տալու: Բա ես էդ պատասխանատվությունը ո՞նց կրեմ: Մարդը համակարգը պիտի փոխի:

Բոլոր էն մարդիկ, ում ես խնդրել եմ թողնել պաշտոնը, նրանք էդ համակարգերը փոխել են: Նրանց համակարգերը իրենց նշանակման պահին նույնը չեն եղել, ինչ հիմա: Բայց գալիս է մի պահ, երբ որ համակարգը փոխող մարդն այնքան շատ է հարազատ դառնում համակարգին, որ հետագա դինամիկ փոփոխության պոտենցիալը էականորեն նվազում է: Իմ ընկալմամբ` դա է այն կետը, որտեղ ես պետք է (հրաժարական տալու-խմբ.) խնդրանքով հանդես գամ»:

***

«Կարող եմ հաստատել, որ Դատախազաի տեղակալ Արթուր Պողոսյանի թեկնածությունն եմ առաջադրելու ՔԿ նախագահի պաշտոնում: 2020թ-ին կամ ավելի ուշ Արթուր Պողոսյանը նշանակվել է ԱԱԾ Քննչական դեպարտամենտի ղեկավար: Այդ նույն ահազանգերը` կոռուպցիոն գործարքների շուրջ եղել են նաև այդ ժամանակ և հերքվել են»,- հայտարարեց Նիկոլ Փաշինյանը:

***

Պետեկամուտների կոմիտեի նախագահի պաշտոնում ունեմ թեկնածուներ։ Այդ մասին «Հանրային հեռուստաընկերության»-ը տված հարցազրույցում ասաց ՀՀ վարչապետ Նիկոլ Փաշինյանը։

«Առաջիկա օրերին ես թեկնածուների հետ մի քիչ ավելի մանրամասն կշփվեմ, որոշ հարցերի շուրջ քննարկումներ կունենամ և որոշում կկայացնեմ, թե ում եմ առաջադրում»,- նշեց նա:

***

«Ես կառավարության նիստի դռնփակ մասում ասացի, որ նաև 2018 թվականից ես ունեմ հանձնարարական՝ զբաղվելու այդ գործով, և ունեմ զեկույցներ, որ այդ խնդիրը լուծվել է, լուծվում է»,- «Հանրային հեռուստաընկերության»-ը տված հարցազրույցում նշեց վարչապետ Նիկոլ Փաշինյանը՝ անդրադառնալով ծառայողական մեքենաների թիվը կրճատելու իր խոստմանը:

«Ինձ թվում էր, թե մենք այդ հարցերն էականորեն, շատ ծանրակշիռ ձևով լուծել ենք, եթե ոչ 100%-ով, գոնե 60-70%-ով, բայց իրականությունը մի փոքր այլ է․․․ Ես հասկանում էի, որ այդ հարցում, ինչպես շատ հարցերում, կացնային մոտեցումը կարող է ուղղակի բազմաթիվ խնդիրներ առաջացնել՝ կազմակերպչական, աշխատանքային և այլն: Եվ ես երեկ մեր գործընկերներին ասացի՝ քանի որ այս ժամանակը և հանձնարարականը պատշաճ չի օգտագործվել այդ խնդիրը համակարգված և խորքային ձևով լուծելու համար, հիմա ես ամենայն հարգանքով այդ խնդիրը լուծելու եմ կացնային ձևով։ Հիմա ինչ է տեղի ունենում․ ես գերատեսչությունների մեքենաների ցուցակները ուզում եմ և առավոտն էլ էի դրանով զբաղված, և ուղղակի այսպես գրիչով խազեր եմ քաշում այդ մեքենաների վրա: Սա կացնային մոտեցում է, և ես համոզված եմ, որ այդ մոտեցման արդյունքում կառաջանան որոշակի կազմակերպչական խնդիրներ, բայց էլի այդ խնդիրները կառաջանան, որովհետև մեր գործընկերները ժամանակին պատշաճ ձևով չեն արձագանքել իմ հրապարակային և ոչ հրապարակային ասածներին: Հիմա ստիպված կացինով պետք է կտրել»,- նշեց Փաշինյանը:

Հարցին, թե քանի տոկոսն է «կացինով կտրելու», Փաշինյանը պատասխանեց. «Շատ մեծ տոկոս, մոտավորապես 80, 90 տոկոսը: Բայց ես ուզում եմ ասել, որ խոսքը ծառայողական ավտոմեքենաների մասին է, որովհետև նախարարություններում, գերատեսչություններում կան մեքենաներ, որոնք չեն ծառայում անձանց, այլ ծառայում են աշխատանքների: Այդ մեքենաների թիվը չի կրճատվի ընդհանրապես։ Հնարավոր է` նույնիսկ ավելանա այս մյուս մեքենաների հաշվին»:

Եթե սահմանը սահմանազատված է, այդտեղ օբյեկտիվորեն դիտորդ ունենալու կարիք չկա պարզապես։ Այս մասին Հանրային հեռուստաընկերությանը տված հարցազրույցում ասաց Նիկոլ Փաշինյանը՝ արձագանքելով հայ-ադրբեջանական սահմանից ԵՄ դիտորդներին հեռացնելու Բաքվի պահանջին։

Փաշինյանը նշեց, որ նման առաջարկ արդեն արվել է Ադրբեջանին։

Նա հիշեցրեց, որ սահմանազատման հարցերով պետական հանձնաժողովների վերջին հանդիպումը տեղի է ունեցել հոկտեմբերին և հանձնաժողովները փոխադարձաբար առաջարկներ են ներկայացրել, թե որ հատվածներում շարունակեն սահմանազատումը․ «ՀՀ–ն իր մտեցումն է ներկայացրել, Ադրբեջանն՝ իրենը։ Հաջորդ հանդիպման ժամանակ կորոշվի որ հատվածում սահմազատումը շարունակել»։

Նրա խոսքով՝ այժմ Ադրբեջանի իշխանությունները կենտրոնացած են COP29–ի վրա և համաժողովի ամփոփումից հետո պրոցեսները կշարունակվեն։

«Բանակցային սեղանի շուրջ Ադրբեջանի Սահմանադրության հարցը մենք չենք քննարկել և օրակարգում չենք ներառել, բայց որ Ադրբեջանը նման դիրքորոշում ունի, դա փաստ է»,– Հանրայինի ՀԸ եթերում ասաց ՀՀ վարչապետ Նիկոլ Փաշինյանը:

«Ադրբեջանն ասում է, որ ՀՀ Սահմանադրության մեջ կա տարածքային պահանջ Ադրբեջանի նկատմամբ։ Մեր քաղաքական արձագանքը մեծ հաշվով էդքան կարևոր չէ, որովհետև ՍԴ-ն է հարցին անդրադարձել սահմանազատման հանձնաժողովների կանոնակարգի քննարկման համատեսքտում:

Ադրբեջանն ինչու է այդ հարցը բարձրացնում, որովհետև իրոք ունի մտավախություններ և մտահոգություննե՞ր, թե դա անում է խաղաղության գործընթացը փակուղի մտցնելու համար:

Հաշվի առնելով բանակցություններում առկա որոշակի առաջընթացը, մենք չենք ուզում առաջնորդվել տրամաբանությամբ, որ Ադրբեջանը հատուկ փակուղի է մտցնում: Դրա համար մենք հատուկ փաստարկներով փորձում ենք էդ մտավախությունը փարատել:

Ակնհայտ է, որ Ադրբեջանի Սահմանադրությունն ունի տարածքային պահանջներ ՀՀ–ի նկատմամբ։ Մենք չենք բարձրացնում Ադրբեջանի Սահմանադրության փոփոխության հարց, քանի որ դա կնշանակեր խաղաղության բանակցության գործընթացը մտցնել փակուղի, և երկրորդ,  խաղաղության պայմանագրի համաձայնեցված մասում ունենք համաձայնեցված հոդված, որտեղ ասվում է, որ կողմերից որևէ մեկը չի կարող հղում անել իր ներքին օրենսդրությանը այս պայմանագրով ստանձնած պարտավորությունները չկատարելու համար։ Իսկ այդ պայմանագրի արդեն իսկ համաձայնեցված  ուրիշ հատվածում արձանագրվում է, որ ՀՀ-ն ու Ադրբեջանը ճանաչում են միմյանց տարածքային ամբողջականությունը, իրար նկատմամբ չունեն տարածքային պահանջներ, և պարտավորվում են ապագայում էլ չառաջադրել տարածքային պահանջներ»,- մանրամասնեց վարչապետը:

***

Հիմա մենք ինչքան ենք նեղվում, երբ ասում են «Արևմտյան Ադրբեջան» և պրոբլեմ ենք համարում, որ ինչ-որ մարդիկ օգտագործում են այդ տերմինը: Բա որ մենք ասում ենք Արևմտյան Հայաստան, չենք մտածո՞ւմ, որ ինչ-որ մարդկանց դա գրգռում է:

«Ես էսօր գտնվում եմ մի կարգավիճակում և մի պատասխանատվության մեջ, որ պարտավոր եմ մեր ժողովրդի հետ խոսել և ցույց տալ պատճառահետևանքային կապերը, շղթաները: Եթե ես դա չանեմ, դա նշանակում է, որ ես գիտակցաբար մեր երկիրը տանում եմ դեպի պետականությանբ կորուստ: Ես չեմ կարող դա թույլ տալ»,- ասաց վարչապետը՝ նշելով, որ հիմա նորից իրեն մեղադրելու են հերթական դավաճանության, «ստոր տականքության» մեջ։

***

Նիկոլ Փաշինյանը վստահ է, որ խաղաղության պայմանագրի կնքման ռեալ հնարավորության դեպքում կարելի է Ադրբեջանի հետ գնալ գործարքի: «Դա կնշանակի, որ ոչ իրենք մեր նկատմամբ, ոչ մենք իրենց նկատմամբ հայցեր նախորդիվ տեղի ունեցած իրադարձությունների վերաբերյալ պետք է չներկայացնենք և հրաժարվենք հայցերից փոխադարձաբար:

Ապագայում էլ նախորդի հետ կապված հայցեր չպետք է ներկայացնենք և հույս ունենանք, որ ապագայում էլ հայց ներկայացնելու առիթ չի լինի: Բայց տրամաբանությունը կլինի այն, որ եթե հանկարծ ապագայում հայց ներկայացնելու առիթ լինի, դա ոչ իրենց, ոչ մեզ ապագայի հետ կապված հարցերի վերաբերյալ չի սահմանափակելու, որպեսզի մենք դա անենք»,- ասաց վարչապետը:

«Մարզային այցերի ժամանակ ինձ համար բացահայտվեցին պրոբլեմներ, որոնք առողջապահության համակարգում առկա են, և իմ գնահատականն այն էր, որ մենք դեռևս պատրաստ չենք այդ մեծ քայլը անելուն»,- այս մասին «Հանրային հեռուստաընկերությանը» տված հարցազրույցում նշեց վարչապետ Նիկոլ Փաշինյանը՝ խոսելով առողջապահության ապահովագրության անցնելու մասին:

«2018-ից ի վեր առողջապահության բյուջեն կրկնապատկվել է։ Պետական բյուջեի հաշվին սպասարկման դեպքերի թիվը ավելացել է․․․ Բայց ես չեմ զգում, որ մարդկանց գոհունակության մակարդակը ավելացել է: Սա ֆենոմեն է, որն ինձ համար բացում է անորոշություններ: Մինչև այդ անորոշությունների պատասխանը չստանամ, ես որոշում չեմ կայացնի առողջապահության ապահովագրության ներդրման համար: Որովհետև կարող է պարզվել, որ մեր դիմաց մի մեծ խորշ կա, որը մենք չենք տեսնում և կարող է մեծ ձախողում, մեծ փլուզում լինել, որը մեզ վրա շատ ծանր կնստի․․․ Մենք համակարգի ներդրումը կանենք այն պահին, երբ անորոշությունների այնքան մասի պատասխանը ունենանք, որ պատկերավոր ասած, մի քանի կմ դեմներս տեսադաշտ լինի»,- նշեց Փաշինյանը։

***

«Եվրոխորհրդարանում նախորդ տարի իմ ունեցած ելույթի հիմնական լոկմոտիվը հետևյալն էր․ ՀՀ-ն պատրաստ է ԵՄ-ին լինել այնքան մոտիկ, որքան ԵՄ-ն հնարավոր կհամարի: Ինձ զարմացրեց, որ իմ այդ ելույթը սոցցանցերում անենամեծ տարածումը և արձագանքը գտավ»,- այս մասին «Հանրային հեռուստաընկերությանը» տված հարցազրույցում նշեց վարչապետ Նիկոլ Փաշինյանը։

«Ես չեմ համարձակվի ասել՝ հանրային կոնսենսուս կա, որովհետև դրա համար վիճակագրություն պետք է լինի բայց ակնհայտ է, որ շատ լայն հանրային ըմբռնում կա, և ստացվում է, որ այդ օրակարգը ես եմ առաջարկել ՀՀ-ին և ԵՄ-ին։ Հանրային արձագանքը այնքան քաջալերող էր և համաձայնության տրամաբանությամբ, որ մենք առնվազն պետք է շատ լուրջ մտածենք։ 50 հազար ստորագրություն որ հավաքվել է, ես գիտեի, որ կհավաքվի, վստահ էի, զգացում ունեմ, որ 300 հազար էլ կհավաքվի»,- նշեց վարչապետը։

Փաշինյանը նաև ընդգծեց՝ տրամաբանական չի համարի, որ ԵՄ անդամակցության գործընթացի մեկնարկի մասին օրինագիծը խորհրդարանում չընդունվի․ «Այն կառավարող մեծամասնությունը, որի քաղաքական լիդերը հայտարարություն է արել ԵԽ ամբիոնից, օրինագծի չընդունելը ոչ միայն հայ հանրությանը, այլ նաև եվրոպական հանրությանը շատ դժվար կլինի բացատրել, կասեն՝ դուք էիք, չէ՞, եկաք, այստեղից այդպիսի բան ասացիք, հիմա դրան դեմ ե՞ք։ Պատկերացնում եք պատասխանը լինի` այո․ չկա այդտեղ քաղաքական տրամաբանություն»։

«Իմ հայտարարությունը քաղաքական է»,- այս մասին «Հանրային հեռուստաընկերությանը» տված հարցազրույցում նշեց վարչապետ Նիկոլ Փաշինյանը՝ անդրադառնալով իր այն հայտարարությանը, ըստ որի՝ Անկախության հռչակագիրը այն մասին է, որ Հայաստանի Հանրապետություն չի կարող գոյություն ունենալ։

«Մենք օբյեկտիվ և սուբյեկտիվ հանգամանքների բերումով Անկախության հռչակագրում դրել ենք մի տրամաբանություն, որը ենթադրում է երկար և խորը կոնֆլիկտներ մեր միջավայրի հետ։ Իսկ այդ երկար և խորը կոնֆլիկտային տրամաբանությունը մեր միջավայրի հետ հետևյալի մասին է, որ կա՛մ այդ կոնֆլիկտների բերումով ՀՀ-ն գոյություն ունենալ չի կարող, որովհետև պատկերացրեք, մենք ստեղծում ենք նորանկախ պետություն և դնում ենք կոնֆլիկտային տրամաբանություն Ադրբեջանի, Թուրքիայի հետ․․․

Հաջորդ տրամաբանությունը այն է, որ մենք այս միջավայրում այս հարաբերությունը ունենալով, հիմա ո՞նց պետք է մենք դիմանանք այս միջավայրում, այս պայմաններում։ Դրա համար մեզ պետք է սուպեր հովանավոր, ուրիշ տարբերակ չկա։ Եթե մենք չենք կարողանում պայմանավորվել մեր միջավայրի հետ համակեցության և գոյակցության մասին, մեր լինելությունը կարող է ապահովել սուպեր հովանավոր ունենալը, որի բռունցքը ավելի մեծ է, և ինքը, իբր, մեր թիկունքին կանգնում է և ինքն է մեր տեղը այսպես անում բոլորին։ Հիմա այստեղ գալիս է երկրորդ ռիսկը, երկրորդ իրականությունը։ Կա՛մ ինքը այնքան բռունցքը կթափահարի, այն մյուսները կվախենան, կգնան իր հետ կպայմանավորվեն, ոնց անեն, որ ինքը այդ բռունցքը չթափահարի: Եթե շարունակի թափահարել, այդ բռունցքը ինչքան նրանց ուղղությամբ է թափահարվում, այնքան էլ մեր ուղղությամբ է թափահարվում, որովհետև մեզ էլ ասում է՝ տե՛ս, հա, քեզ խելոք չպահես, այս բռունցքս հետ կքաշեմ, ու քեզ հետ տեղի կունենա այն, ինչ որ տեղի կունենա, ինչը և տեղի ունեցավ։ Ընդ որում՝ բռունցքները կարող են լինել մի քանիսը»։

Հարցին՝ արդյո՞ք առաջիկայում կդիմի հանրությանը սահմանադրական փոփոխություններ անելու առաջարկով և Անկախության հռչակագրի հղումը կհանի Սահմանադրությունից, Փաշինյանն ասաց. «Եկեք այդ հարցերը չկապենք իրար հետ, որովհետև մեր ՍԴ-ն արդեն ասել է, որ մեր Անկախության հռչակագիրը դե յուրե իրավական ուժ ունի միայն այդ հատվածով, որոնք Սահմանադրության մեջ բառացի արտահայտված են։ Իմ ասած մասերը Սահմանադրության մեջ ոչ մեկը բառացի արտահայտված չեն»:

Փաշինյանն ընդգծեց, որ Անկախության հռչակագրի մասին իր խոսքը վերաբերվում է մեր ներքին ըմբռնմանը, մեր սոցիալ հոգեբանությանը:

«Հայաստանին նոր Սահմանադրություն է պետք, և ժողովորդը պետք է իրոք ընդունի այդ Սահմանադրությունը»,- կարծիք հայտնեց վարչապետը։