Էլեկտրաէներգիայի սակագնի ավելացման ու այդ առիթով բնակչության շրջանում  բարձրացած բողոքի ակցիայի ֆոնին Asekose.am-ին ուշագրավ տեղեկություններ են հաղորդել  Հայաստանի Էլեկտրական Ցանցեր ՓԲԸ-ի` ՀԷՑ-ի տեսուչները, որոնք , հասկանալի պատճառներով, ցանկացել են չնշել իրենց անունները:

Նրանք բողոքում են ՀԷՑ-ի ղեկավարության կողմից  իրենց վրա դրված  «պլանից». յուրաքանչյուր տեսուչի վրա դրված է 1 միլիոն դրամի պլան ու անկախ այն փաստից, թե բնակչությունը հնարավորություն ունի վճարել, թե ոչ` տեսուչները պարտավոր են ամեն ամսվա համար ՀԷՑ-ին ներկայացնել եթե ոչ  1 միլիոն դրամ հավաքագրում, ապա ` առնվազն  դրա 98 տոկոսը:

Տեսուչները նաև բողոքում են, որ ժամանակին  շատ էին դեպքերը, երբ վեճեր էին  ծագում  այն բնակիչների հետ, ում բնակարանների էլեկտասնուցումն անջատվում էր`  պարտքերի պատճառով, մինչդեռ , նրանց տեղեկություններով, Ռուսաստանում սպառած էլեկտրաէներգիայի պարտքի պատճառով բնակարանները չեն հոսանքազրկվում. եթե բնակիչը չի կարողանում վճարել էլեկտրաէներգիայի կուտակած պարտքը, ապա  խնդիրը  ` երբեմն  ամիսներ անց  միայն հնարավոր է  լուծել  դատական կարգով, այլ ոչ` «կոշտ» մեթոդներով` բնակարանների էլեկտրասնուցումը անջատելով :  Հիշեցնենք, որ ՀԷՑ-ը 2006 թվականից ռուսական «ԻՆՏԵՐ ՌԱՕ ԵԷՍ» ընկերության դուստր ձեռնարկությունն է.   Հայաստանի բնակիչների համար,սպառած էլեկտրաէներգիայի պարտքի գանձման դեպքում, կարծես`  գործում է խտրականության սկզբունքը:

Խտրականության սկզբունքը, թերևս,  գործում է նաև  տեսուչների աշխատավարձերի առումով, որոնք իրենց 1 միլիոնանոց ամսական  «պլանն» ապահովելուց հետո ստանում են ընդամենը  մոտ 140.000 դրամ, ինչն անհամատեղելի է իրենց ռուսաստանցի գործընկերների աշխատավարձի հետ:

Ի դեպ, տեսուչները բողոքում են, որ շատ են դեպքերը, երբ «պլանն» ապահովելու համար իրենք ստիպված են սեփական գրպանից դնել պակասորդը: Իսկ ովքեր չեն կարողանում «պլան»-ն ապահովել`  ասվում է. «կարող եք ազատման  դիմում  գրել` ձեր փոխարեն կաշխատեն նրանք,ովքեր կարող են ապահովել 100 տոկոսանոց հավաքագրում»:

Արդյունքում` բնակչութան մի մասի անվճարունակության ու  իրենց վրա դրված «պլանի» ֆոնին` տեսուչները հայտնվում են երկու կրակի արանքում, սակայն ամեն ինչ անում են վարձավճարների հավաքագրումն ապահովելու համար` աշխատանքը կորցնելու  տխուր հեռանկարից խուսափելու նպատակով:  

Հիշեցնենք, որ էլեկտրաէներգիայի սակագնի ավելացումը պատճառաբանվում է էներգահամակարգում   20 միլիարդ դրամի ճեղքվածքով  էներգահամակարգում, իսկ  ՀԷՑ-ի տնօրեն Եվգենի Բիբինն, ըստ ասեկոսեների,  ամսական  ստանում է  մոտ 40  միլիոն դրամ աշխատավարձ:

Նշենք նաև, որ օգոստոսից, 4 դրամ թանկանալուց հետո, Հայաստանը համարվելու է՝ ամենաթանկ էլեկտրաէներգիա սպառող երկրներից մեկը, եթե ոչ՝ ամենաթանկը: