21-ամյա ազատ ոճային ըմբիշ Ռազմիկ Պապիկյանը 2019 թ.-ից սկսել է հաղթել մեծահասակների պայքարում, նա մեծ ցանկություն ուներ լավ արդյունք գրանցելու նաեւ Եվրոպայի ու Աշխարհի առաջնություններում, ինչը նրան հաջողվեց միայն 2-րդ փորձից: Այս մասին Ռազմիկը Asekose.am-ին ասաց զրույցի ժամանակ:
«2-րդ փորձից ունեցա մեդալ մեծահասակների պայքարում: 2020-ի դեկտեմբերին առաջին անգամ Աշխարհի գավաթի ժամանակ մեդալին մոտ էի, սակայն բաց թողեցի այն: 2021-ին Եվրոպայի առաջնությունում ոսկին կրկին բաց թողեցի, ինչը սակայն ավելի է մեծացնում պայքարելու ցանկությունը: Ես միշտ վերադառնում եմ այնտեղ, որտեղ կիսատ մնացած գործ ունեմ»:
Ըստ երիտասարդ մարզիկի՝ ուժեղ մարդու ամենակարեւոր հատկանիշներից մեկն այն է, որ պետք է լինել հաղթող ցանկացած իրավիճակում:
«Նույնն էլ սպորտին է վերաբերում: Հաղթելը միայն ոսկին ունենալն է, ինչն ինձ դեռ չի հաջողվել: Միջազգային ասպարեզում ունեցել եմ 2 փորձ, սակայն 2 -ն էլ արծաթով են ավարտվել, բայց ես ունեմ հաղթողի հոգեբանություն եւ համապատասխան հոգեվիճակ, համոզված եմ, որ այդ օրն էլ կգա: Վերջին արծաթն էլ մարդկանց ցույց տվեց, որ երկար դադարից հետո ես նորից պայքարում եմ»:
Նշենք, որ ամիսներ առաջ համացանցում բուռն քննարկվում էր այն տեսանյութը, որում Ռազմիկը գորգում քաշում էր թուրք մարզիկի ականջը: Հարցին՝ թե ի՞նչ էր ասում թուրք մարզիկին, Ռազմիկը լակոնիկ ասաց, որ առաջարկել է գորգից դուրս խոսել միջադեպի վերաբերյալ:
«Ես միայն կենտրոնացած էի արդյունքի վրա: Նախապես միայն հաղթանակն էի ծրագրել: Հիմա էլ ամենամեծ ցանկությունս ու նպատակս մինչեւ տարեվերջ MMA-ում նորամուտ ունենալն է», -ասաց մարզիկը:
Զրույցի ընթացքում Ռազմիկն անդրադարձավ նաեւ անձնական կյանքին, մասնավորապես՝ այն խոսակցություններին, որ սիրելի ունի, վերջինս էլ հանրային դեմք է: «Ըստ լուրերի՝ իմ կյանքում կարող են պարբերաբար աղջիկներ լինել՝ հայտնի եւ ոչ այդքան: Փորձում եմ անձնական կյանքս հանրային քննարկման առարկա չդարձնել, հակառակ դեպքում՝ դա այլեւս անձնական կյանք չէ»:
