Հոկտեմբերի 12-ին Վազգեն Սարգսյանի անվան «Հանրապետական» մարզադաշտում Ազգերի Լիգայի խաղարկության խմբային փուլի Հայաստան – Ջիբրալթար խաղից առաջ տեղի ունեցավ Հայաստանի ազգային հավաքականի գլխավոր մարզիչ Արմեն Գյուլբուդաղյանցի և պաշտպան Վարազդատ Հարոյանի նախախաղային մամուլի ասուլիսը։

-Վարազդատ, ի՞նչ տրամադրվածություն է թիմում, և ի՞նչ դասեր եք խաղել նախորդ խաղից։

-Չեմ ցանկանա խոսել նախորդ խաղից։ Առաջիկա մրցակցի մասին խոսելիս կնշեմ, որ ուսումնասիրել ենք մեր մրցակցին։ Նման հավաքականների դեմ միշտ դժվար է խաղալ։ Կխաղանք, կհաղթենք և հետո նոր կմտածենք հաջորդ խաղի մասին։ Երկու խաղում էլ պետք է հաղթենք, քանի որ միավոր կորցնել այլևս չենք կարող։

-Քեզ ոչ միշտ ենք տեսնում «Ուրալի» մեկնարկային կազմում, սակայն վերջերս արդեն խաղում ես։ Ինչպե՞ս ես հիմա քեզ զգում և ի՞նչ մարզավիճակում ես։

-Լավ մարզավիճակում եմ։ Մենք մի փոքր լեգեոներների խնդիր ունենք։ Տարբեր դիրքերում ունենք ոչ տեղացի ֆուտբոլիստներ, և սահմանափակման պատճառով ոչ բոլորն են կարողանում միշտ խաղալ։

-Մրցակիցը, ամենայն հավանականությամբ, խաղալու է հակագրոհներով։ Որպես պաշտպան՝ ֆունկցիոնալ ինչպիսի՞ վիճակում ես գտնվում, արդյոք հասցնելու՞ ես մրցակցի պաշտպանների հետևից։

-Ինչպես արդեն նշեցի՝ մեզ բավական բարդ հանդիպում է սպասվում, բայց մենք լիովին պատրաստ ենք խաղին, ուղղակի պետք է կենտրոնացած անցկացնել ամբողջ հանդիպումը։

-Երկար դադարից հետո հավաքական է վերադարձել Յուրա Մովսիսյանը։ Ի՞նչ կասես նրա վերադարձի մասին։

-Շատ ուրախ ենք, որ Յուրան վերադարձել է։ Բոլորս էլ գիտենք, թե նա որքան բարձր մակարդակի ֆուտբոլիստ է։ Հավաքականի մարզաշապիկով դաշտ դուրս գալիս միշտ ուրիշ տրամադրվածությամբ ու նվիրվածությամբ ես հանդես գալիս։ Ինձ թվում է՝ Յուրայից պետք է միայն լավը սպասել։

-Վարազդատ, հոգեբանական տեսանկյունից ինչպե՞ս է թիմի վրա ազդել մարզչական փոփոխությունը։

-Ինձ չի թվում, որ շատ մեծ տարբերություն կա։ Արդեն մոռացել ենք նախորդ հանդիպման անհաջողությունը, և լիովին տրամադրված ենք այս խաղին։ Ինձ թվում է՝ մեզ ոչինչ չի կարող խանգարել։

-Պարոն Գյուլբուդաղյանց, Մարկոսը պատրա՞ստ է խաղին, թե ոչ։ Եվ արդյո՞ք կան այլ ֆուտբոլիստներ, ովքեր վնասվածք ունեն։

-Մարկոսը թեթև վնասվածք ուներ, բայց արդեն 2 մարզում անցկացրել է։ Հուսանք՝ պաստրաստ կլինի հանդիպմանը։ Ինչպես գիտեք՝ Օզբիլիսը և Չալըշըրը վնասվածքներ են ստացել, և դա մեծ կորուստ է հավաքականի համար։ Բայց ունենք այն, ինչ ունենք։

-Յուրա Մովսիսյանը եռամյա դադարից հետո միացել է հավաքականին։ Արդյո՞ք նա հասցրել է ինտեգրվել թիմին, և արդյո՞ք հարյուր տոկոսով պատրաստ է հանդիպումներին։

-Յուրան շատ բարձրակարգ ֆուտբոլիստ է, նա ինտեգրվելու կարիք չունի։ Վստահ եմ, որ Յուրա Մովսիսյանի խաղից կզգաք թիմի հզորությունը և ուժեղացումը։

-Հավաքականի կազմին նայելիս այնպիսի տպավորություն է, որ ոչինչ չի փոխվել: Արդյո՞ք  չկայի՞ն ֆուտբոլիստներ Հայաստանում կամ արտերկում, ովքեր թարմություն կբերեին հավաքականին։

-Կա մի ֆուտբոլիստ, որ Ուրուգվայից է, կուզենայինք` նա միանար հավաքականին, բայց նա դեռ չի համաձայնվում կրել մեր ընտրանու մարզաշապիկը։ Եվս 3-4 ֆուտբոլիստներ կան, ովքեր կարող էին ուժեղացնել թիմը, սակայն վնասվածքներ ունեն։ Դիտելով մարզումները` վստահ կարող եմ ասել, որ տղաները պատրաստ են և վաղը դաշտում անելու են ամեն ինչ, որ հասնեն արդյունքի։

-Հավաքականի ավագի թևկապը մնալո՞ւ է Մխիթարյանի մոտ, թե կունենանք նոր ավագ։

-Հենրիխ Մխիթարյանը մեր թիմի առաջատարն է, և նա շարունակելու է լինել նաև թիմի ավագը։

-Ձեր գլխավորությամբ ինչպիսի՞ն է լինելու հավաքականի խաղային փիլիսոփայությունը և մարտավարությունը։

-Կնախընտրեի չխոսել մարտավարությունից։ Ես վստահ եմ, որ տղաները դուրս են գալու խաղադաշտ, ցուցադրելու են արժանապատիվ խաղ և հասնելու են դրական արդյունքի։

-Հասարակության մոտ կարծիք կա, որ եթե մարզիչը արտերկրից է, ապա հավաքականը ավելի լավ հանդես կգա։ Ինչպե՞ս եք դուք վերաբերում այդ կարծիքին։

-Կարծիքը՝ կարծիք, բայց եկեք խոսենք փաստերով։ Ռուսասանի հավաքականը մի քանի առաջ անելանելի իրավիճակում հայտնվելուց հետո հրաժարվեց Կապելոյից, և նրան փոխարինելու եկավ տեղացի Սլուցկին։ Եվ հենց նա օգնեց հավաքականին դուրս գալ Եվրո 2016-ի եզրափակիչ փուլ։ Նույնը կարող եմ ասել Չերչեսովի մասին։ Դրանք ընդամենը կարծիքներ են։

-Կցանկանայինք` ներկայացնեիք մեր վաղվա մրցակցին՝ Ջիբրալթարին, քանի որ այն մի փոքր անհայտ թիմ է մեզ համար։

-Լավ ուսումնասիրել ենք Ջիբրալթարին։ Բավականին համարձակ ֆուտբոլ են խաղում։ Ընդհանրապես, իրենց հիմնական կազմի ֆուտբոլիստները իրար հետ միևնույն թիմում են խաղում, այդ պատճառով նրանց խաղակցվածությունը բարձր մակարդակի վրա է։ Թե դրսում, թե տանը փորձում են հարձակվողական ֆուտբոլ խաղալ։

-Լայն տարածված կարծիք կա, որ վաղը մենք շատ հեշտ հաղթանակ ենք տանելու, և խմբի ամենակարևոր խաղը լինելու է 3 օր անց՝ ընդդեմ ՆՀՀ Մակեդոնիայի։ Արդյո՞ք համաձայն եք այդ կարծիքին։

-Եթե նման կերպով մտածենք, հետևանքները շատ վատը կլինեն։ Պետք է շատ լուրջ պատրաստվենք խաղին, հարգենք հակառակորդին և փորձենք մեր ֆուտբոլը խաղալ, որպեսզի հասնենք արդյունքի։ Այսօր մենք միայն կենտրոնացած ենք Ջիբրալթարի խաղի վրա։

-Որպես նորանշանակ մարզիչ՝ ի՞նչ ուղերձ ունեք մեր երկրպագուներին։

-Սա միայն մեր ֆուտբոլիստների խաղը չէ, սա մեր ազգի խաղն է։ Սա իրոք մեր ազգի պատվի խաղն է։ Մեր ակումբերի հաջողություններն էլ հնարավոր չէին լինի առանց երկրպագուների։ Հուսամ՝ վաղը նրանք կգան, կաջակցեն մեզ, և մենք կհասնենք արդյունքի։

-Հավանաբար դիտել եք Մակեդոնիայի դեմ մեր նախորդ խաղը։ Արդյո՞ք այդ խաղում մեր թիմը արժանապատիվ հանդես եկավ։

-Մեր մարզիչն այդ խաղի համար ընտրել էր շատ ճիշտ մարտավարություն, ուղղակի կոնկրետ այդ խաղում ինչ-որ բան չստացվեց։ Ստացվելու դեպքում կարող էինք նաև հաղթել։

-Պետրոս Ավետիսյանը վերջապես հրավիրվել է հավաքական։ Ի՞նչ կարծիքի եք նրա և նրա խաղի մասին։

-Շատ լավ տպավորություն եմ ստացել Պետրոսից։ Տեսաք, որ երիտասարդական հավաքականի՝ ՆՀՀ Մակեդոնիայի դեմ անցկացրած հանդիպման ընթացքում դարձավ երկու գոլի հեղինակ։ Գրանցված ինքնագոլում նույնպես նրա դերակատարությունը շատ մեծ էր։ Մեծ հույսեր եմ կապում Պետրոս Ավետիսյանի հետ։ Նա մեր հավաքականի ապագա առաջատարներից է։