Բասկետբոլի Հայաստանի տղամարդկանց հավաքականն առաջիկա երկուշաբթի կսկսի պատրաստվել Եվրոպայի առաջնության ընտրական փուլի առաջիկա խաղերին: Այդ մասին Հայաստանի ազգային օլիմպիական կոմիտեի պաշտոնական կայքին հայտնել է Հայաստանի բասկետբոլի ֆեդերացիայի գլխավոր քարտուղար Արթուր Նազարյանը:
Մեր հավաքականը Օլիմպավանում կանցկացնի երկու մարզում, որից հետո կմեկնի Ալբանիա, որտեղ նոյեմբերի 23-ին այդ երկրի հավաքականի հետ կանցկացնի ընտրական փուլի առաջին հանդիպումը: Երեք օր անց մեր թիմն իր հարկի տակ կընդունի Դանիային:
«Ամռանն Ալբանիայի հետ երկու ընկերական հանդիպում ենք անցկացրել եւ երկուսում էլ հաղթել ենք: Բայց այն ժամանակ մենք հանդես ենք եկել մարտական կազմով», – ասել է Արթուր Նազարյանը:
Բանն այն է, որ մեր հավաքականն այդ խաղերից առաջ կազմի հետ կապված լուրջ խնդիրներ ունի:
«Մոտ տասը խաղացողներ տարբեր պատճառներով չեն կարողանում միանալ մեզ: Մասնավորապես՝ ԱՄՆ-ում հանդես եկող բասկետբոլիստները: Հարցականի տակ է նաեւ Եվրոպայում խաղացող մի քանի բասկետբոլիստների՝ Քրիս Յանկու Օսկիյանի, Ռայան Բոաթրայթի, Մարսել Հովսեփյանի մասնակցությունը: Մեզ չի կարող օգնել նաեւ իրանահայ Վարդան Բիդրոսյանը: Վերջինս փաստաթղթերի հետ կապված խնդիրներ ունի: Նույն պատճառով հնարավոր է թիմին չմիանա Արագատ Աբրահամյանը», – եզրակացրել է ֆեդերացիայի գլխավոր քարտուղարը:
