«Հրապարակ»-ը գրում է․ Վերջերս էքստրեմալ սպորտի նոր տեսակ է զարգանում Հայաստանում՝ թռիչք քննչականի պատուհանից։ Որպես կանոն, նման թռիչքների ելքը մահացու է։ Մարդիկ կարող են թռիչքի պահին ձեռնաշղթաներով կամ ձեռքերն ազատ լինել` կարեւոր չէ։ Կարեւորն այն է, որ քննիչները կամ ուղեկցողները չնկատեն, թե ինչպես են նրանք իրենց բախտը փորձում` բաց պատուհանից իրենց նետելով։
Վերջին տարօրինակ մահը գրանցվել է հուլիսի 20-ին՝ Քննչական կոմիտեի տնտեսական հանցագործությունների եւ մաքսանենգությունների քննության գլխավոր վարչության շենքում։
Այն ձեւակերպվել է որպես դժբախտ պատահար։ ՔԿ-ն ընդամենը հաղորդեց, որ օպերատիվ տեղեկություններ է ունեցել ՌԴ քաղաքացի հանդիսացող, ազգությամբ ռուս 30-ամյա անձի կողմից իր անվամբ թմրամիջոցների՝ դեմիթոքսիֆենէթիլամինի պարունակությամբ ծանրոցներ ստանալու մասին:
Նրան արգելանքի են վերցրել հուլիսի 19-ին, մի քանի օր առաջ նախաձեռնված թմրամիջոցների մաքսանենգությանը վերաբերող վարույթի շրջանակներում։ Արգելանքի վերցնող մարմինը ՊԵԿ Մաքսանենգության դեմ պայքարի վարչությունն է եղել։ Այս մանրամասները, որոնք փաստացի առնչություն չունեն մահվան դեպքին, ՔԿ-ն հաղորդում է՝ հավանաբար, ցույց տալու համար, թե ինչ վատն է եղել հանգուցյալը, մաքսանենգ ճանապարհով ծանրոցներ է ստացել, այն էլ՝ թմրանյութեր, ու տարածել։ «Նա ներկայացվել է ՀՀ քննչական կոմիտեի տնտեսական հանցագործությունների եւ մաքսանենգությունների քննության գլխավոր վարչություն, եւ վարույթն իրականացնող քննիչի կողմից կայացվել է նշված անձին թմրամիջոցների մաքսանենգություն կատարելու հիմնավոր կասկածանքի հիմքով ձերբակալելու որոշում»,- հայտնում է ՔԿ-ն, սակայն հիմնական հարցի շուրջ, որը հուզում է հազարավոր մարդկանց, թե ինչպես է լինում, որ Քննչական կոմիտեի բաժիններում օրը ցերեկով, տասնյակ աշխատողների աչքի առաջ հարցաքննության ներկայացած մարդիկ մահանում են, ՔԿ-ն համարյա ոչինչ չի ասում։
«Տեսագրման պայմաններում եւ փաստաբանի ու թարգմանչի մասնակցությամբ անցկացվել են հարցաքննություն եւ դրան առնչվող անհրաժեշտ վարույթային գործողություններ։ Այդ գործողությունների ավարտից հետո վերջինս, հետաքննության մարմնի ծառայողների ուղեկցությամբ, ձեռնաշղթաներով դուրս է եկել նախաքննություն իրականացնող քննիչի՝ հինգերորդ հարկում գտնվող աշխատասենյակից, միջանցքով մինչեւ վերջ գնացել է դեպի վերելակ տանող ելքի դուռը։ Դուռը բացվելուն պես նա անակնկալ արագ մոտեցել է վերելակին անմիջականորեն կից բաց պատուհանին եւ իրեն ցած նետել, ինչի հետեւանքով մահացել է»։ Այս նկարագրությունն ավելի շատ հարցեր է առաջացնում։ Ինչպե՞ս մարդը կարողացավ ձեռնաշղթաներով նետվել ցած: Եթե ձեռնաշղթա են անցկացրել, ինչո՞ւ անձին չեն ուղեկցել, եթե ուղեկցել են, ինչո՞ւ չեն կանխել թռիչքը, ինչո՞ւ են բաց պատուհան թողնում հարկաբաժնում, որտեղ ձեռնաշղթաներով անձինք են «ֆռֆռում»։ Եվ, վերջապես, ինչո՞ւ պատուհաններին չկան ճաղավանդակներ, եթե արդեն նման թռիչքների առաջին դեպքը չէ սա։
Մենք փորձեցինք զրուցել հանգուցյալի փաստաբանի հետ, որը մեր հանրային պաշտպաններից է, սակայն նա հրաժարվեց զրույցից։ Մեզ հաջողվեց պարզել՝ կասկածներ կան, որ 30-ամյա ռուս տղամարդուն հասցրել են ինքնասպանության։ Նախաձեռնվել է վարույթ երկու հոդվածներով՝ «Ինքնասպանության հասցնելը» (Քրօր․-ի 162 հոդված, մաս) եւ «Պաշտոնեական անփութություն, որն անզգուշությամբ առաջացրել է մարդու մահ» (Քրօր․-ի 1446 հոդված, մաս 2)։
Երեկվա դեպքը մեր իրավապահ համակարգում կատարվող նմանատիպ առաջին դեպքը չէ` այն հիշեցրեց մի քանի ամիս առաջ Արտաշատի քննչական բաժնում տեղի ունեցած պատահարը։ Ապրիլի 27-ին նույն եղանակով՝ պատուհանից ընկնելով, մահացել է Արարատի Հովտաշեն գյուղի բնակիչ, 62 տարեկան մսավաճառ Միսակ Պողոսյանը։ Ըստ նրան ճանաչող անձանց՝ նա հանգիստ, խաղաղ անձնավորություն էր, բայց սովորություն ուներ՝ կանեփ էր ծխում։ ՔԿ-ն այդ օրը հաղորդել էր, որ Պողոսյանը ցատկել է մարզային քննչական վարչության շենքի երրորդ հարկի միջանցքի լուսամուտից եւ մահացել։ Նույն հաղորդագրության մեջ հանգուցյալին հանրության աչքից գցելու միտումով նշվում էր, որ նրան մեղադրում են մարիխուանա շրջանառելու մեջ։ Պողոսյանի եղբորորդին դեպքից հետո հայտնել էր մեզ, որ քննչականի բակն արագ լվացել էին, արյունը մաքրել։ Հոկտեմբերից նրա հետեւից ընկած են եղել, կալանավորել են երկու ամսով, փորձել են երկարացնել ժամկետը, դատարանը մերժել է, Պողոսյանին ազատել են ու մի երկու ամսից նորից բերման ենթարկել, բացարձակ անհիմն, որից հետո էլ կատարվել է ողբերգությունը։ «Քննիչի ասելով՝ Միսակ Պողոսյանը դուրս է եկել ծխելու, մինչեւ փաստաբանը գա։ Փաստաբանն իրենց տնից 10 րոպեում հասել է քննչական, քննիչն ասել է՝ բա չիմացա՞ր ինչ եղավ, Միսակ Պողոսյանն իրեն քցեց։ Ո՞նց հասցրեց իրեն քցել, ուղեկցողներն այնտեղ են եղել»,- հարցնում է Միսակ Պողոսյանի ազգականը։
Գործը քննվում էր Քննչական կոմիտեի Մասիսի բաժնում, հետո, ըստ Միսակ Պողոսյանի փաստաբան Սամվել Միրզոյանի, դատախազությունը գործը տեղափոխել է ԱԱԾ։ Ինչո՞ւ։ Սամվել Միրզոյանը եւս խուսափում էր հարցերին պատասխանել։ Ակնհայտ է, որ փաստաբանները կաշկանդվածություն ունեն եւ չեն ցանկանում հրապարակավ արտահայտվել Քննչական կոմիտեի բաժանմունքներում տեղի ունեցող մահվան արտառոց դեպքերի մասին։ «Այդպես են որոշել։ Կա մարդ, որը մեղադրվում է թմրանյութերի իրացման մեջ, եւ նախաքննության ընթացքում նա մահացել է։ Ես իմ տպավորությունը չեմ ասի, որովհետեւ չեմ ուզում հրապարակել նախաքննական գաղտնիք, իմ տպավորությունն արդեն գաղտնիքի բացահայտում է։ Համոզված եմ, որ քննությունն օբյեկտիվ է լինելու։ Երբ որ ավարտվի քննությունը, այդ մարդը, որն իմ պաշտպանյալի մահվան պատճառ է դարձել, պատասխան է տալու»,- ասաց փաստաբանը։
Այսպիսով, Քննչական կոմիտեի բաժանմունքները վտանգավոր են դարձել ՀՀ քաղաքացիների կյանքի եւ առողջության համար։ Ծեծի, խոշտանգումների դեպքերին, որոնք վերջին մի քանի ամսում բազմապատկվել են, երկրի ղեկավարը չի արձագանքում։ Միայն Տիգրան Առաքելյանի դեպքը կարող էր բավարար լինել Քյարամյանին պաշտոնանկ անելու համար, որը, ըստ տուժողի, անձամբ էր ծեծել իրեն: Փաշինյանը կարծես քարտ բլանշ է տվել խոշտանգումներում մասնագիտացող Արգիշտի Քյարամյանին՝ անվերապահորեն հավատալով ՔԿ հերքումներին։ Շուտով երկրում Փաշինյանը միակ մարդն է մնալու, ով հավատում է Քյարամյանին։
