«Հայկական ժամանակ» թերթը գրում է, որ քաղաքական շրջանակներում համառորեն լուրեր են պտտվում, որ ոստիկանապետ Վլադիմիր Գասպարյանի թիկնազորի պետ Արշակ Հակոբյանը, այդուամենայնիվ, ձերբակալված է եւ պահվում է Ազգային անվտանգության ծառայությունում։
«Սույն տեղեկության վերաբերյալ երեկ ողջ օրը այդպես էլ ԱԱԾ-ից մեկնաբանություն ստանալ չհաջողվեց։ Մամուլի խոսնակը ոչ քաղաքային եւ ոչ էլ բջջային հեռախոսին չէր պատասխանում։ Անպատասխան մնաց նաեւ գրավոր ուղարկված մեր հարցումը։
Քաղաքական շրջանակներում պնդում են, որ ոստիկանապետի թիկնազորի պետն անցնում է ԱԱԾ-ում հարուցված մի քանի քրեական գործերով։
Երեկ զանգահարել ենք նաեւ անձամբ Հակոբյանի հեռախոսահամարով։ Նրա հեռախոսը, սակայն, եւս լռում էր։ Թաղամասում (Արեշ), որտեղ բնակվում է Արշակ Հակոբյանը, նույնպես խոսում են, որ ոստիկանապետի թիկնազորի պետը ձերբակալված է։ Այս լուրը, իհարկե, հաստատված համարել չենք կարող, բայց հերքելու երեկվա մեր բոլոր փորձերը ձախողվեցին»։
Շարունակությունը և ուշագրավ այլ հոդվածներ` «Հայկական ժամանակ» թերթի այսօրվա համարում
