Երեկ մեկնարկեց ԱԺ գարնանային նստաշրջանը: Մինչ ՀՀԿ-ական Կարինե Պողոսյանը դահլիճում ֆոտոսեսիա էր կազմակերպում, հանկարծ ներս մտավ Գագիկ Ծառուկյանը, ում մուտքն անակնկալի բերեց ոչ միայն լրագրողներին, այլեւ իր խմբակցության ու մյուս պատգամավորներին: Այդ մասին գրում է «Իրատես de facto» թերթը։
«ԲՀԿ խմբակցության անդամները մեկիկ-մեկիկ մոտեցան, ողջագուրվեցին «շեֆի» հետ: Ամենաուշագրավը Սամվել Ալեքսանյանի «մոտեցումն» էր. պատգամավորներին այս ու այն կողմ հրելով, լայն ժպիտով մոտեցավ Ծառուկյանին ու «ջիգյարով» համբուրվեց:
Ի տարբերություն Ծառուկյանի «փառավոր» մուտքի, գրեթե աննկատ մնաց նիստերից երկար բացակայող մեկ այլ պատգամավորի` Ստեփան Դեմիրճյանի ներկայությունը: Վերջինս բավականին գունատ տեսք ուներ: Լրագրողների հետ զրույցում Դեմիրճյանը նկատեց, որ դեռ չեն շտապում ՀԱԿ-ից դուրս գալ: Լրագրողները նաեւ խմբված սպասում էին Գագիկ Ծառուկյանի «երկու խոսքին», բայց այդպես էլ Ծառուկյանը դահլիճից դուրս չեկավ:
Պարզվեց` Գալուստ Սահակյանը Գագիկ Ծառուկյանին ԱԺ նախագահին պատկանող մուտքով դուրս էր տարել, ինչն ԱԺ կանոնակարգի խախտում է. այդ մուտքով կարող է դուրս գալ միայն ԱԺ նախագահը կամ «ինչ-որ մեկը»` նրա ուղեկցությամբ: Ակնհայտ է, որ այդ կերպ խնամին լրագրողների ձեռքից «ազատեց» մյուս խնամուն»,- գրում է «Իրատես de facto-ն:
