«Ռուբեն Ջաղինյանի «Այս սարն իմն է, այս ծառն իմն է» հրամանը կատարող կացինները չթույլատրեցին կայանել Շարմի դիմաց: Նարեկացի կենտրոն էի եկել և կենտրոնին մոտ կայանելու տեղ չկար, իսկ միակ տեղը նախարարությունների շենքի դիմացն էր: Մի քանի անգամ պտույտ կատարելուց հետո փորձեցի կայանել Շարմի դիմաց, բացատրելով, թե ինչ խնդիր ունեմ և ինչու հեռու չեմ կարող կայանել: Ինձ ասացին, որ դա Մշակույթի նախարարության տարածքն է և նախարարի հրամանով չի թույլատրվում: Ես նկարեցի տարածքը, որտեղ նախարարության նշանը բացակայում է և պահանջեցի փաստաթուղթ ներկայացնել, հրամանը նախարարի:
Դրանից հետո նրանք խոստովանեցին, որ փաստաթուղթ չկա և նրանք կատարում են Ռուբեն Ջաղինյանի հրամանը: Ի՞նչ է ստացվում, որ ինձ թույլատրեցին ավտոմեքենայով ԱԺ տարածք մուտք գործել, կայանատեղ չլինելու դեպքում, ինձ թույլատրում են Օպերայի բակում կայանել, բայց Ռուբեն Ջաղինյանի հրամանը կատարող կացինները չթույլատրեցին կայանել Շարմի դիմաց: Իհարկե ես, ի վերջո, կայանելու տեղ գտա, բայց դա մեծ ջանքեր պահանջեց»:
Այսօր, երբ Շարմի դիմացի մայթն էի հեռախոսով նկարում, տարածքը վերահսկողը ինձ հարցնում է.
- Ակտիվի՞ստ ես:
Ծիծաղս եկավ: Նա այնպես հարցրեց, կարծես իրավապահի հարց տար: Ես էլ ասացի, որ ոչ, որ շարքային քաղաքացի եմ և ուզում եմ պարզել, թե այդ ինչու ես չեմ կարող այդտեղ կայանել, երբ չկա այլ տեղ կայանելու և ես, ով ունի տեղաշարժման խնդիր, պետք է այս ազատ տեղում կայանելու փոխարեն կայանի այնպիսի տեղում, որտեղ կայանելը ինձ համար լրացուցիչ խնդիրներ կարող է ստեղծել:
Ինձ ՃՈ-ից նամակներ էին եկել, երբ արգելված տեղում էի կայանել ու տեսախցիկները ֆիքսել էին: Բայց երբ ես պատասխան նամակում նշեցի, թե ինչու եմ կայանել այդտեղ և որ ես տեղաշարժման խնդիր ունեմ, այդ արձանագրությունները բեկանեցին:
