Վերարտադրողական առողջության, պերինատալոգիայի, մանկաբարձության և գինեկոլոգիայի հանրապետական ինստիտուտում ապրիլի 2-ին ծնված երկու օրական նորածին է մահացել: Նորածնի հայրը դիմել է ոստիկանություն՝ հաղորդելով, թե դժբախտ դեպքի պատճառը ծննդատան բժշկուհու կողմից սխալ բուժումն է:
Asekose.am-ի հետ զրույցում Վերարտադրողական առողջության, պերինատալոգիայի, մանկաբարձության և գինեկոլոգիայի հանրապետական ինստիտուտի տնօրեն Ռազմիկ Աբրահամյանն ասաց, որ կնոջը հիվանդանոց են տեղափոխել ծանր վիճակում.
«Կնոջ 4-րդ կեսարյան հատումն է եղել, նրան ուղեգրել են մեզ մոտ ծանր վիճակում՝ արգանդի պատռվածքի նշաններով: Ապրիլի 2-ին 32 շաբաթական հղիություն ունեցող կինը կեսարյան հատումով ծննդաբերել է, և 24 ժամը չլրացած երեխան մահացել է: Նորածնի մոտ առկա է եղել խիստ արտահայտված ներարգանդային ինֆեկցիա, որը ծանր ախտորոշում է: Երեխայի մոտ լեյկոցիտների քանակը եղել է 50.000, մինչդեռ նորմայում պետք է էլիներ 5.000: Սա արտառոց երևույթ է: Ես ինքս եմ դիմել ոստիկանություն և ուղարկել դատաբժշկական փորձաքննության: Այստեղ բժիշկները որևէ մեղք չունեն»:
