Asekose.am-ի տեղեկություններով, օպերային թատրոնի տնօրեն Անդրանիկ Արզումանյանն առաջիկայում աշխատանքից ազատման դիմում է ներկայացնելու։
Նրան արդեն այսօր առաջարկել են դիմում գրել, սակայն վերջինս հրաժարվել է, սակայն հայտնի չէ, թե որքան կարող է դիմադրել վերևների որոշմանը:
Նա օպերային թատրոնը ղեկավարում է 2014-ի ապրիլից: Նշենք, որ նրա նշանակումը միանշանակ չէր ընդունվել արվեստագետների և Օպերայի և բալետի ազգային ակադեմիական թատրոնի կոլեկտիվի կողմից:
«Ճիշտ է, ես Հայաստանում չեմ ապրում, բայց դա չի նշանակում, որ Հայաստանի հետ կապս խզել եմ` ամեն տարի 1-2 ամսով Երևան եմ եկել: Ճիշտ է, ոչ Հայաստանում, սակայն մշակութային ոլորտում ղեկավարման փորձ ունեմ: Ես տեղյակ եմ նաև Օպերայի խնդիրների մասին, գիտեմ, որ խմորումներ կան, հեշտ չի լինելու, սակայն կարևորը համախմբվելն է, ընտանիք դառնալը»,-այն ժամանակ հայտարարել էր Անդրանիկ Արզումանյանը:
Հ.Գ.
Մեր այս նյութի հրապարակումից քիչ անց՝ պաշտոնական տեղեկություն տարածվեց, ըստ որի Անդրանիկ Արզումանյանը նշանակվել է մշակույթի նախարարի խորհրդական, իսկ Կոնստանտին Օրբելյանը նշանակվել է Օպերայի և բալետի ազգային ակադեմիական թատրոնի տնօրենի ժամանակավոր պաշտոնակատար:
Հեղինակ՝
Ա.Գրիգորյան