«Ժողովուրդ»-ին հայտնի դարձավ, որ ՀՀ Կառավարությանն առընթեր անշարժ գույքի վարչությունը Երեւանի Նազարբեկյան 48 հասցեի բազմաբնակարան անավարտ շենքում բնակվող ընտանիքներից դիմումներ է ստացել: Մարդիկ պահանջում են, որ նշված հասցեի պետական սեփականություն համարվող բնակարանները, որտեղ նրանք տասնյակ տարիներ ապրել են, սեփականաշնորհեն իրենց անունով:

Տեղեկացնենք, որ այս հասցեի շենքում բնակվող ընտանիքները սոցիալապես անապահով վիճակում են ապրում: Այս պատճառով էլ Կառավարությունն իր այսօրվա նիստում որոշում է կայացնելու այդ բնակարանները սեփականաշնորհել ցանկացող ընտանիքներին նվիրաբերելու մասին: Սակայն, ինչպես միշտ, մեր գործադիրն իր պարտականությունները թերի է կատարում: Բանն այն է, որ դեռեւս 2012 թվականին «Սեյսմակայուն շինարարության եւ կառուցվածքների պահպանման հայկական գիտահետազոտական ինստիտուտ» ԲԲԸ-ի կողմից տրված եզրակացության համաձայն՝ վերը նշված շենքի տեխնիկական վիճակն ընդհանուր առմամբ գնահատվել է անբավարար: Եւ հիմա բնակիչները ստիպված են լինելու իրենց միջոցներով շենքի շինարարությունն ավարտին հասցնել: Ավելին՝ Կառավարությունը համաձայնել է այդ բնակարանները տվյալ ընտանիքներին որպես սեփականություն հատկացնել մի պայմանով՝ եթե քաղաքացիները պարտավորվեն անհրաժեշտության դեպքում իրենց միջոցների հաշվին մասնակցություն ցուցաբերել Նազարբեկյան 48 շենքի ընդհանուր օգտագործման տարածքների ամրացման եւ բարեկարգման աշխատանքներին: Նրանք նաեւ պարտավորվում են համապատասխան պայմանագրերի կնքումից առնվազն 10 տարի չվաճառել եւ չգրավադրել իրենց նվիրաբերվող բնակարանները:

Մի խոսքով, նվերը «քթերից բերում են»:

Ուշագրավ այլ նյութեր «Ժողովուրդ»  թերթում