Օրեր առաջ մամուլում տեղեկություն հայտնվեց այն մասին, որ Արցախի Հանրապետության վարչապետի պաշտոնակատար Արայիկ Հարությունյանն առաջիկայում նշանակվելու է պետնախարար, որն իր կարգավիճակով հավասար է փոխվարչապետի պաշտոնին: Արայիկ Հարությունյանի` նոր պաշտոնին անցնելուն նախորդել է տհաճ միջադեպ: Հիշեցնենք, որ սեպտեմբերի 5-ին բարերար Արթուր Վարժապետյանի նվիրաբերած մեքենաները հանձնվեցին տարբեր անձանց Արցախի Հանրապետությունում։ Asekose.am-ն իր ընթերցողներից մեկից նամակ էր ստացել, որում նշվում էր, որ Արայիկ Հարությունյանը բարեխոս դարձավ, որ հիվանդանոցի համար նախատեսված ուազ մակնիշի մեքենան փոխվի ու դառնա իր սիրելի սանիկի մոր` Քաշաթաղի շրջանի Կովսական քաղաքի հիվանդանոցի տնօրենի` Լուսինե Սարգսյանի անձնական օգտագործման համար «Նիվա» մակնիշի մեքենա: Նամակում նշված էր, որ հենց միջոցառման ժամանակ Լուսինեն մոտեցել է ու հիվանդանոցի համար նախատեսված ուազի բանալիները փոխել «Նիվա» բանալիների հետ, որը պետք է անձամբ ինքն օգտագործի։
Թեմայի շուրջ պարզաբանում ստանալու նպատակով Asekose.am-ը զրուցել է Քաշաթաղի շրջանի Կովսական քաղաքի տեղամասային հիվանդանոցի վարիչ Լուսինե Սարգսյանի հետ:
«Դա սուտ է: Դա ուղղված չի եղել մեր Քաշաթաղի հիվանդանոցին, իմ կարծիքով` դա ուղղված է եղել ամբողջ Քաշաթաղի շրջանին: Քաշաթաղի կառավարությունը երբեք ոչ արդար և ոչ անիրական որոշում չի կայացրել»,- ասաց մեր զրուցակիցը` հերքելով վերոնշյալ տեղեկությունը:
Հիվանդանոցի վարիչը մեզ հետ զրույցի ընթացքում պարզաբանեց տեղի ունեցածը:
«Մեքենաները չեն անհետացել: Քաշաթաղն այնքան արդար մարզ է` իր կայունությամբ և ընտանեկան ջերմությամբ, որ այստեղ բազմաթիվ մարդիկ են եկել վերաբնակեցման նպատակով: Հիվանդանոցի համար ի սկզբանե նախատեսված է եղել «Նիվա» մակնիշի մեքենա, որն էլ հիվանդանոցը ստացել է: Թյուրիմացություն է տեղի ունեցել: Նախագահ Բակո Սահակյանը Կովսականի հիվանդանոցին շտապօգնության մեքենան տվել է ընդամենը 3 տարի առաջ: Հիվանդանոցը շտապօգնության մեքենայի կարիք չի ունեցել, մենք ուզել ենք ծառայողական մեքենա: Մեր հիվանդանոցը գոմից սարքել ենք արքայական պալատ»,- պատմեց մեր զրուցակիցը:
Վերջինս, անդրադառնալով նրան, որ Արայիկ Հարությունյանն իր դստեր կնքահայրն է, և ինքն օգտագործում է քավոր-սանիկ հարաբերություններն անձնական ինչ-ինչ հարցեր լուծելու նպատակով, նշեց.
«Քավոր-սանիկ հարաբերությունը սուտ է, ո՞վ է նման բան ասում, կամ ի՞նչ գործոն ունի դա: Ես արդեն 17 տարի է` աշխատում եմ Կովսականում: 2001 թվականից ապրում եմ Լեռնային Ղարաբաղի Հանրապետության Իշխանաձոր գյուղում: Երկար ու ձիգ տարիներ ես իմ անձնական մեքենան օգտագործում եմ Քաշաթաղի բնակիչների համար, իմ Քաշաթաղի վերակառուցման համար: Ես նվիրյալ մարդ եմ իմ կյանքով ու ընտանիքով: Անձնական շահերը ոչ մեկին չեն վերաբերում, այստեղ որևիցե գործոն չի կարող լինել, թե ես ում սանիկն եմ, ով ում քավորն է: Եթե նման տեղեկություն են հավաքում, թող առաջինն իրենց անձի մասին հավաքեն, դա իմ աշխատանքում որևէ հարց չի կարող փոխել կամ շարժառիթ հանդիսանալ իմ որևիցե գործողության համար: Լուսինեն երբեք հիվանդին չի վնասել իր գլուխը գովալով կամ «беспредел» քայլեր անելով: Ես Քաշաթաղի ծառան եմ, իմ բնակչի ծառան եմ: Երբ ինձ այսօր շնորհավորում են մեքենայի կապակցությամբ, ես յուրաքանչյուրին ասում եմ` սա ձեր վաստակն է»:
Մեր զրուցակցի կարծիքով` այս ամեն հետևում կանգնած է մեկը, ով տեղյակ չէ ոչնչից, և փորձում է լավ գործի հետևում էլ վատը տեսնել:
«Նախանձն է խոսում մարդկանց մեջ, ովքեր փորձել են խաղալ իմ անվան հետ: Չեմ կարող ասել, թե սա ում ձեռքի գործն է, որովհետև ես թշնամիներ չունեմ: Ծննդաբերությունից 3 օր հետո ես ծառայել եմ Քաշաթաղին, ծննդաբերել եմ ճանապարհին`մեքենայի մեջ` հանուն քաշաթաղցու բարօրության, քանի որ խիստ դեպրեսիայի մեջ էի` կապված մահացու հիվանդներից մեկի մահվան հետ: Քաշաթաղը մի մեծ ընտանիք է, մենք բոլորս նրա ծառաներն ենք»,-Aseksoe.am-ի հետ զրույցում նշեց Քաշաթաղի շրջանի Կովսական քաղաքի տեղամասային հիվանդանոցի վարիչ Լուսինե Սարգսյանը:
Արցախի վարչապետի մամուլի քարտուղար Արտակ Բեգլարյանը Asekose.am-ի հետ զրույցում նույնպես հերքեց տեղեկությունը` նշելով հետևյալը.
«Այս տեղեկատվությունը, բնականաբար, սուտ է: Վարչապետը որևէ միջամտություն չունի այն գործին, թե Արթուր Վարժապետյանի կողմից որ մեքենան ում է տրվել, առավել ևս`եթե կառավարության կողմից խորհուրդ է տրվում, որ այս պետական մարմինը կամ այս հիվանդանոցը կարիք ունի մեքենայի: Դա տրվում է շրջանի տվյալ կառույցին, այլ ոչ թե անձին: Այս մեքենան էլ տրվել է Կովսականի հիվանդանոցին: Գլխավոր բժիշկն այս դեպքում, բնականաբար, իրավունք չունի այն իր անձնական նպատակների համար օգտագործելու»:
Հեղինակ` Ա. Մաթևոսյան
