Շուրջ մեկ ամիս առաջ միջազգային «The Voice» նախագծի «Թուրքիայի ձայն» հաղորդման միակ հայ մասնակիցը` պոլսահայ Ջորջ Շեքերը, միլիոնավոր հանդիսատեսի առաջ անվարան հայատրարեց` ես հայ եմ…
Իր այս արարքով նա գրավեց ոչ միայն հայաստանաբնակ հայերի, այլև ողջ հայության ուշադրությունը:
Ելույթից հետո Ժյուրիի անդամների և Ջորջի միջև հետաքրքիր երկխոսություն ծավալվեց: Նրանցից մեկը հետարքրվեց երգչի անվան և ազգանվան ծագումով, նշելով, որ հավանաբար հայրը թուրք է, մայրը` օտարազգի, իսկ Ջորջը նշեց, որ ինքը հայ է:
Պոլսահայ մեր հայրենակիցը նախագծի շրջանակներում կատարում էր «Անձայն նավ» (Sessiz Gemi) երգը: «կույր լսումների» ժամանակ նա իր կատարումով հիացրեց ժյուրիի անդամներին, սակայն «մենամարտեր» փուլից հետո լքեց նախագիծը:
Նախագծին մասնակցելու և այն լքելու պատճառների, ընտանիքի, ապագա ծրագրերի և այլ հարցերի շուրջ է ASEKOSE.am-ի թղթակցի բացառիկ հարցազրույցը` Ջորջ Շեքերի հետ:
- Սիրելի Ջորջ, դու չթաքցրեցիր ինքնությունդ և բացահայտ հայտարարեցիր, որ հայ ես, մի նախագծի շրջանակներում, որը միլիոնավոր լսարան ունի և հեռարձակվում է ամենաառաջատար հետուստաալիքներից մեկով: Շրջապատում շատե՞րը գիտեն որ հայ ես: Երբևէ որևէ հարցում հայ լինելդ խոչընդոտե՞լ է քեզ...
-Այնտեղ, որտեղ ես ապրում եմ, իմ շրջապատում բոլորը գիտեն, որ ես հայ եմ: Ով էլ չգիտեր, արդեն իմացել է:
-Պատմիր, խնդրում եմ, ընտանիքիդ, ծնողներիդ մասին: Նրանց արմատները որտեղի՞ց են:
-Հայրս և մայրս Ստամբուլում են ապրում: Մայրս ծնունդով Յոզգաթից է, հայրս` Ստամբուլից: Երջանիկ ու մեծ ընտանիք ունեմ: Թեև ծնողներս երաժշտական ասպարեզում ինձ աջակցություն չեն ցուցաբերել, սակայն կարողացել են իմ մեջ հավատ ներշնչել, որ ես կարող եմ ու փոխել են իմ գաղափարնեները: «Թուրքիայի ձայն»-ին մասնակցությունս ևս լավ առիթ էր ուժերս փորձելու այս ասպարեզում:
-Ինչպե՞ս որոշեցիր մասնակցել «Թուրքիայի ձայն»-ին: Եվ ո՞րն էր, ըստ քեզ նախագծից դուրս մնալու պատճառը:-
-Մրցույթին մասնակցել եմ զուտ հաճույքի համար: Ցանկանում էի, որ հիշատակ մնար, և ինչու ոչ, նաև փորձ ձեռք բերեի: Ստացվեց այնպես, ինչպես ես էի ցանկանում: Ինչ վերաբերում է նախագծից դուրս մնալուն, Էբրու Գյունդեշը մեծ արվեստագետ է և Ես հարգում եմ նրա կարծիքը: Նշանակում է` ավելի շատ պետք է աշխատեմ` հաջողության հասնելու համար: Նախագծի շրջանակներում մեծ թվով ընկերներ եմ ձեռք բերել, բոլորն էլ լավ մարդիկ են:
-Կշարունակե՞ս երգել...-
Այո, իհարկե...սա իմ աշխատանքն է:
-Երբևէ եղե՞լ ես Հայաստանում, կամ կցանկանայի՞ր լինել...
-Հայաստանում դեռ չեմ եղել, սակայն , երաժշտական նախագծերի կամ երաժշտության հետ կապված ցանկացած միջոցառման րջանակներում կցանկանայի լինել Հայաստանում:
Հեղինակ` Հասմիկ Գյոզալյան
