Այսօր ASEKOSE.am-ի հրապարակումներից մեկում անդրադարձել էինք Թբիլիսիում դեռ ամիսներ առաջ տապալված Իրինա Ալեգրովայի համերգին:
Թբիլիսիում ապրող մեր մի խումբ ընթերցողներ, ովքեր գնել էին այդ համերգի տոմսերն, ահազանգել էին, որ իրենց վնասները դեռ չեն փոխհատուցվել: Մեզ հետ զրույցում նրանք նշել են, որ համերգների կազմակերպմամբ զբաղվող «Ալեքս Իվենթ» ընկերությունն ու Զառա Մխեյանը համերգը չեղյալ են հայտարարել՝ պատճառաբանելով, որ տոմսերը չեն վաճառվել:
Մեր զրուցակիցները, սակայն, տեղեկացրել են, որ իրենց շրջապատում բազմաթիվ մարդիկ անգամ 2-3 տոմս էին գնել,սակայն մինչ օրս իրենց գումարները չեն վերադարձել: Ընթերցողները նաև իրենց հիասթափությունն ու վրդովմունքն են հայտնել կազմակերպիչների անպատասխանատվության և վնասները փոխհատուցելու ուղղությամբ քայլեր չձեռնարկելու մասին:
Վերոնշյալ հրապարակման ներքո «Forpostar» ընկերության PR մասնագետը «սպառնալից» մեկնաբանություն է թողել՝ չմոռանալով նաև մեզ դասեր տալ ու խոստանալով մեզ դատի տալ:
PR մասնագետն, ակնհայտորեն, ինչ-որ բան խառնում է. չանդրադառնալով նրա «փայլուն» մտքերին, ցանկանում ենք հարցնել` հետաքրքիր է՝ ո՞րն է մեր հրապարակման մեջ չափազանցությունը կամ ոչ հավաստի տեղեկությունը ու առավել ևս` «պատվերը» . որ մարդիկ իրենց գումարները չե՞ն ստացել, որ շատերը մի քանի տո՞մս են գնել, թե՞ որ վրդովված են կազմակերպիչների անպատասխանատվությունից:
Մենք բարձրաձայնել ենք մեր ընթերցողներին հուզող խնդրի մասին, ովքեր մոտ երկու ամիս զանգահարում են տապալված համերգի կազմակերպիչներին ու չեն կարողանում իրենց տոմսերի գումարը ստանալ: Հիմա ուրախ ենք, որ «Ալեքս Իվենթ» ընկերության քույր կազմակերպությունը գտնվել է և մեր բողոքավոր ընթերցողները կարող են գրել նրանց ֆեյսբուքյան էջին` առավել ևս զանգահարել նրանց երևանյան գրասենյակ:
Իսկ մեր հրապարակումը մեկնաբանելու ու գնահատականներ տալու փոխարեն՝ ավելի ճիշտ կլինի «Forpostar»-ը զրուցի հենց նրանց հետ, ովքեր մինչև այսօր իրենց խաբված են համարում ու իրենց գումարն են պահանջում:
Ընկերության PR մասնագետին էլ, ով սպառնում է, թե կդիմի դատարան ու շարունակում է դասեր տալ մեզ ՝ լրագրության մասին, առաջարկում ենք իր «հեղինակավոր» կարծիքը թաքցնել իր ամենաեկամտաբեր վայրում:
