Ապրիլի 23-ին Գյումրիում հնչած մահվան ելքով կրակոցներից հետո չեն դադարում խոսակցություններն այն մասին, որ հանրապետության երկրորդ քաղաքը շարունակում է մնալ հանրապետության կրիմինալ մայրաքաղաքը: Կատարված սպանության եւ ոստիկանապետի հայտնի հայտարարությունների` պատգամավորների եւ գողականների համեմատության հետ կապված, galatv.am-ի լրագրողը զրուցել է ԱԺ նախագահ Հովիկ Աբրահամյանի հետ:
-Համամիտ եք արդյո՞ք այն որակումների հետ, որ Գյումրին կրիմինալ քաղաք է:
-Գյումրին կրիմինալ քաղաք չէ, կարող է Գյումրիում լինեն կրիմինալներ, որոնց դեմ պետք է պայքարել եւ պատժել` ըստ հանցագործության, չի կարող մեկ, երկու, երեք կլանների համար ամբողջ քաղաքը համարել կրիմինալ, դրա հետ ես համամիտ չեմ:
- Ըստ Ձեզ` ովքեր են այդ կլանները ներկայացնում:
-Դիմեք իրավապահ մարմիններին` թող հայտարարեն:
-Պարո´ն Աբրահամյան, Դուք Գյումրու նախկին քաղաքապետ Վարդան Ղուկասյանի հետ բավականին մոտ հարաբերություններ ունեք, ինչպես կբնութագրեք նրա կատարած աշխատանքը, եւ արդյո՞ք կլան ասելով` նկատի ունեք Ղուկասյանների ընտանիքը:
-Ես որեւէ անգամ Վարդան Ղուկասյանի անունը չտվեցի, ես ասացի կլաններ կան, որտեղ որ կան նաեւ հանցագործներ, եւ հանցագործները պետք է պատժվեն, նրանց տեղը հասարակության մեջ չէ, ես համամիտ եմ դրա հետ: Եվ ընդհանրապես, Վարդան Ղուկասյանը, որ աշխատել է քաղաքապետ, Դուք գիտեք, որ քաղաքապետ ընտրվում է, չի նշանակվում, եւ գյումրեցիներն են ընտրել, ինքը վատ չի աշխատել, եկեղեցիներ է կառուցել, գեղեցիկ քաղաքապետարանի շենք է կառուցել եւ համոզված եմ, որ Վարդանը Ղուկասյանը վատ չի աշխատել:
-Եթե ոստիկանապետը հրապարակի այն պատգամավորների անունները, ովքեր զանգահարել են, հնարավո՞ր է նրանց ԱԺ-ից հեռացնելու հարց դրվի:
-Չեմ կարծում, որ նման պատգամավորներ կլինեն:
-Այդ դեպքում ու՞մ նկատի ուներ Վլադիմիր Գասպարյանը:
-Ես ի՞նչ գիտեմ, ով որ խոսել է, իրեն հարցրեք:
-Իսկ ինչպե՞ս եք վերաբերվում պատգամավորներին գողականների հետ համեմատությանը:
-Ես գողականների հետ գործ չունեմ, մենք խորհրդարանական ենք:
