Ադրբեջանի և Հայաստանի միջև հապճեպ և ոչ պատշաճ կերպով պատրաստված խաղաղության պայմանագիր կնքելու փորձն ապագայում կհանգեցնի նոր հակամարտությունների, այս մասին ТАСС-ին տված հարցազրույցում ասել է ՌԴ ԱԳՆ ԱՊՀ երկրների չորրորդ վարչության տնօրեն Դենիս Գոնչարը։ «Առաջնահերթությունը պետք է տրվի ոչ թե արագությանը, այլ հավասարակշռված և փոխընդունելի լուծումների որակյալ նախապատրաստմանը»,- ընդգծել է դիվանագետը։ Նա նաև ուշադրություն է հրավիրել այն հանգամանքի վրա, որ արևմտյան մայրաքաղաքներից պարբերաբար հայտարարություններ են հնչում, թե Երևանն ու Բաքուն կկարողանան խաղաղության պայմանագիր կնքել «մոտակա շաբաթների և ամիսների ընթացքում»։ Ըստ Գոնչարի՝ ստորագրման ժամկետը կողմերն իրենք պետք է որոշեն։