Life.panorama.am-ը գրում է, որ իր այսօրվա զրուցակիցը ՀՀ վաստակավոր արտիստուհի Նելլի Խերանյանն է: Դերասանուհի, ով երբեք չի տրվում էմոցիաներին, լուրջ է, հավասարակշռված ու սկզբունքային: Իր իսկ խոսքերով՝ հիասթափություններից խուսափելու լավագույն մեթոդն է ընտրել: Մեր զրույցը ստեղծագործական, անձնական և տոնական անցուդարձի շուրջ է:
-Ինչպե՞ս եք եզրափակում տարին:
-2014 թվականն ինձ համար կարևոր էր նրանով, որ, վերջապես, կյանքի կոչեցինք «Ռիչարդ երրորդ»-ի բեմադրությունը: Առաջին անգամ էի Արթուր Սահակյանի հետ աշխատում և շատ ուրախ եմ մեր համագործակցության համար: Սակայն 2014 թվականն այնքան էլ հարթ տարի չէր. մեծ ուրախություններ քիչ եղան, «քնած» տարի էր: Հուսամ, հաջորդ տարին այդպես չի լինի: Ես սիրում եմ, երբ նորություններ կան, անընդհատ գործընթացի մեջ ես, առաջխաղացումներ ու սպասելիքներ ես ունենում: Իսկ այս տարին այդ առումով լուռ էր:
-Լուռ էր, քանի որ Ձեզ չհանդիպեցի՞նք էկրաններին:
-Ճիշտն ասած՝ ոչ: Խոսքս իմ ու Տիգրանի մի շատ հետաքրքիր ձեռնարկի մասին է, բայց այդ մասին հիմա փակագծեր չեմ բացի: Հուսամ, եկող տարի ամեն ինչ լավ կընթանա և այդ մասին կկարողանամ բացահայտ խոսել: Հավատում եմ, որ մյուս տարի անակնկալս կստացվի և ավելի նպաստավոր գործընթաց կսկսեմ իմ կյանքում:
-Հեռուստադիտողը սովոր է Ձեզ և Ձեր ամուսնուն՝ Տիգրան Ներսիսյանին, էկրաններին միասին տեսնել, ֆիլմերում, սերիալներում համատեղ եք ներկայանում: Դա Ձե՞ր պահանջն է:
-Ոչ, ոչ, ուղղակի այդպես ստացվում է: Գիտեք, մեր մասնագիտության մեջ վատ բաներից մեկն այն է, որ մեծամասամբ դու չես ընտրում, այլ քեզ են ընտրում: Օրինակ, վերջին սերիալում, որտեղ աշխատել եմ, միայն ես եմ եղել: Բայց ասեմ, որ ես սիրում եմ Տիգրանի հետ աշխատել, որովհետև մասնագիտական առումով միմյանց սովոր ենք, երկար տարիների խաղընկերներ ենք և միմյանց հասկանում ենք կես բառից: Միշտ էլ հաճելի է, որ աշխատում ես մեկի հետ, ում լավ ճանաչում ես գործի մեջ:
Առավել մանրամասն` սկզբնաղբյուր կայքում
