Այսօր, «Ազատության» ֆեյսբուքյան ասուլիսում, խոսելով Երևանի Պետական համալսարանի խնդիրների շուրջ, ԵՊՀ ռեկտոր Արամ Սիմոնյանն, անդրադառնալով ԵՊՀ-ում տիրող կոռուպցիայի մասին լուրերին, նշել է, թե չկա մի հաստատություն, որտեղ կոռուպցիա չլինի և ԵՊՀ-ն զերծ չէ դրանից, իսկ իրենք պետք է աշխատեն այդ «քաղցկեղը» սահմանափակել:
Օգտատերերից մեկը հարց ուղղեց նրա ունեցվածքի մասին` նշելով, որ հարստությունը կուտակել է ԵՊՀ-ում ռեկտոր աշխատած տարիներին:
«Էն մարդիկ, ովքեր հետևում են իմ ունեցվածքին, ես հրավիրում եմ` թող գան մեր տուն, տանեմ իմ ամառանոց, նայեն, տեսնեն՝ ինչ ունեմ, ինչ չունեմ: Ես բարեկեցիկ ընտանիքում եմ մեծացել, իմ հայրը եղել է հայտնի գործիչ, ակադեմիկոս, կարողացել է ապահովել իմ ապրելու պայմանները, որոնց մեջ ես մեծացել եմ: Դրանց մեջ վատ բան չեմ տեսնում, ես շքեղ կյանքով չեմ ապրում, դղյակներ չունեմ... նայած թե ինչ հեռախոսով են նկարում իմ տունը: Ունեմ մի հին ավտոմեքենա, վերանորոգել եմ և երբեմն ձկնորսության եմ գնում դրանով: Իհարկե, ընտանիքում կա ավտոմեքենա, աղջիկս ունի փոքրիկ մեքենա, բայց նա ինքնուրույն է: Այդ ամենը հնարովի պատմություններ են»,- ասել է Արամ Սիմոնյանը:
