Նախկին ՈւՀԱ-ական, ապա սցենարիստ, դերասան, հաղորդավար Արմեն Թադևոսյանից Asekose.am-ը  փորձել է  պարզել Comment's հաղորդման ու նրա ապագա ծրագրերից որոշ մանրամասներ:

-Ինչո՞ւ հենց Comment's: Ո՞րն է Comment's –ի իմաստը:

-Ճիշտն ասած՝ Comments անվանումը միանգամից իմ մտքին եկավ, քանի որ հենց ծրագրի ֆորմատը այնպիսին է, որ մեկնաբանվում է ամեն ինչ, անգամ այն ամենը ինչը, մեկնաբանության կարիք չունի:

-Դուք որպես ՈՒՀԱ-ի ակումբի ավագ անդամ, ի՞նչ կարծիք ունեք այսօր Հայաստանում գոյություն ունեցող հումորի մասին:

- Հումորը տարիների ընթացքում, բնականաբար, փոխվում է, փոխվում է մատուցումը, ինչ-որ առումով նաև արդիական լինելը: Ժամանակին մենք ավելի շատ հումորներ էինք անում տեքստերի տեսքով, այսինքն՝ տեքստային հումորներ, հիմա ավելի շատ հումորը կապված է գործողությունների հետ: Դե իսկ, թե ինչպես եմ ես վերաբերվում Հայաստանում գոյություն ունեցող հումորի մասին, կարծում եմ շատ նորմալ: Ցանկացած մարդ հումոր է անում, կամ փորձում է անել այնպես, ինչպես ինքն է պատկերացնում:

-Մի քանի տարի առաջ գրեթե բոլոր համալսարանական խմբերը պայքարում էին ՈւՀԱ-ում լավագույնը դառնալու համար: Սակայն այդ ամենը շատ կարճ կյանք ունեցավ: Ըստ ձեզ` ՈւՀԱ-ի իմաստն է արդեն վերացել, թե մեր օրերի հումորին ՈւՀԱ-ն չհամակերպվեց:

-Նախ ասեմ, որ ՈՒՀԱ-ն կամ ինչպես այն ավելի ճիշտ հնչում է КВН-ը ռուսական խաղն է, որի միջազգային լեզուն ռուսերեն է: Առաջին հերթին, իմ կարծիքով, ժամանակին շատ մեծ սխալ էր կտրուկ ամբողջությամբ հրաժարվել ռուսերեն լեզվից: Հիմա կան շատ շնորհալի և հումորով լի երիտասարդներ, բայց միևնույն ժամանակ կարծում եմ, որ այսօր հենց ռուսերենի և ռուսերեն լեզվով հումոր գրել և անելու պակասություն կա:

-Արմեն Թադևոսյանը նաև 90-ականների հումորի ներկայացուցիչներից է, ով կարողանում էր անկեղծ ժպիտ պարգևել հանդիսատեսին: Այսքան տարի անց, սերունդների փոփոխության մեջ հումորը ի՞նչ փոփոխությունների է ենթարկվել:

- Ցանկացած ժամանակ դու փորձում ես հումոր անել տվյալ ժամանակին համահունչ: Կարևորը՝ դու փորձես անել այն, ինչ մարդկանց կարող է ժպիտ առաջացնել և ուրախություն: Այդ իսկ առումով, ծիծաղը մնում է ծիծաղ ցանկացած ժամանակաշրջանում:

-Արմեն Թադևոսյանին, բացի YERE1 նախագծից, էլ որտե՞ղ կարող ենք տեսնել: Առաջիկա ձեր պլանների մասին ի՞նչ կասեք:

-Գիտեք, իմ հարազարտ Արմենիա Tv-ի կարգախոսը  «Դեռ ամեն ինչ առջևում է»: Այդ կարգախոսը նաև ինձ է  շատ հոգեհարազատ, որովհետև դեռ անելիքները շատ կան և պետք է շարունակել աշխատել: Այնպես որ, առաջիկա պլանների մասին դեռ չեմ խոսի, այդ ամենը դուք ինքներդ կտեսնեք:

-Մշտապես բազմազբաղ լինելով հանդերձ՝ հասցրե՞լ եք ընտանիք կազմել։

-Բարեբախտաբար, այո՛․ կինս ու երեխաներս առանձնահատուկ դեր ունեն իմ կյանքում։ Տղաս՝ Դավիթը, մեծ հետաքրքրություն է ցուցաբերում ֆուտբոլի նկատմամբ և այսօր նա մարզվում է «Փյունիկ» ֆուտբոլային ակումբում, իսկ աղջիկս՝ Էլենը, մեծ սեր ունի դեպի պարարվեստը։ Ինձ համար կարևորը նրանք ապագայում Աստծո, հայրենիքի ու նոր հետո մեզ համար լավ զավակներ լինեն։

Հեղինակ՝ Էմմի Մանուկյան