Հանրահայտ բրիտանական BBC լրատվամիջոցի կայքի՝ աշխարհի տարբեր ճանապարհորդական ուղղություններին նվիրված BBC Travel բաժինն այս անգամ անդրադարձել է Հայաստանին:
«Աշխարհի առաջին քրիստոնեական երկի՞րը». ահա այսպես է վերնագրված հոդվածը, որում ներկայացված են Հայաստանի կրոնական պատմությունը, հայկական նշանավոր եկեղեցիներն ու խաչքարերը, պատմվում է հոգևոր առաջնորդի՝ Գրիգոր Լուսավորչի մասին, նաև՝ քրիստոնեությա` որպես պետական կրոնի ընդունման, Խոր Վիրապի, Գառնու հեթանոսական տաճարի, Գեղարդի վանքի պատմության և ստեղծման, Վաղարշապատ քաղաքի և այնտեղ գտնվող Սուրբ Գայանե եկեղեցու մասին:
«Այս եվրոպական երկիրը քրիստոնեությունը պետական կրոն դարձրեց 301 թվականին, և այդ պատմությունը կարելի է դեռևս տեսնել պատմական վայրերի միջոցով»,- գրում է BBC-ն:
Կայքը նշել է, որ Հայաստանը հարուստ է նաև խաչքարերով, որոնք համարվում են ապրող կամ մահացած հոգու փրկության խորհրդանիշ:
«Առաջին խաչքարերը հայտնվել են 9-րդ դարում: Այսօր այս քարերն ընդգրկված են ՅՈՒՆԵՍԿՕ-ի ոչ նյութական մշակութային ժառանգության ցանկում: Նորատուսի գերեզմանատանն է գտնվում երկրում խաչքարերի ամենամեծ խմբաքանակը՝ ավելի քան 800 խաչքար, որոնցից ամեն մեկը յուրահատուկ նախշեր ունի»:
Ուշագրավ է հատկապես այն փաստը, որ կայքն անդրադաձել է նաև Սյունիքի մարզում գտնով Քարահունջին և այն համեմատել է Անգլիայի Սթոունհենջի հետ:
