Երևանում բացվել է Արևիկ Գրիգորյանի «Մտացրիվ» խորագրով անհատական առաջին ցուցահանդեսը: Երիտասարդ նկարչուհու խոսքով՝ ցուցահանդեսը վերնագրել է «Մտացրիվ», քանի որ այն մարդու հույզերի մտքերի հետ է կապված և ամեն աշխատանք մի հոգեվիճակի, մի մտածմունքի մասին է: «Մարդն անընդհատ մտացրիվ է, մտածում է` խոսի, թե չխոսի, ու պրոցեսն էլ միշտ գնում է, իսկ նկարելով արտահայտվում ես ներսումդ կուտակվածը»,-ասում է Արևիկ Գրիգորյանը, որ մինչ այս մասնակցել էր մի քանի խմբակային ցուցահանդեսների:
Ցուցահանդեսին ներկա արվեստագետներն ու ավագ գործընկերները բարձ են գնահատել երիտասարդ նկարչուհու աշխատանքները՝ նրանց մեջ նկատելով մտքերի ազատություն ու գույների անկեղծություն, իսկ այցելուներից ոմանք, նկատի ունենալով մայրաքաղաքում առկա սառնամանիքը , կատակում էին, որ առաջիկայում Երևանում արև է լինելու ու մտացրիվ եղանակ: