Օրերս ինչո՞ւ են առաջնագծում հիմնականում անապահով խավերի երեխաները հարցին պատասխանելիս ՊՆ նախարար Սեյրան Օհանյանն ասել էր, որ մեր հասարակությունը պետք է վերլուծի ու հասկանա՝ ովքե՞ր են այսօր կարողանում բարձրագույն կրթություն ստանալ, ովքե՞ր են կարողանում գիտական թեզեր պաշտպանել եւ տարկետում ստանալ զինծառայությունից, ովքե՞ր են կարողանում ասպիրանտուրա ընդունվել…:
Իսկ ԱԺ-ում հարց ու պատասխանի ժամանակ պատգամավոր Ռուբեն Հակոբյանը շտապել էր հիշեցնել, որ ինքն ու Թևան Պողոսյանը նախագիծ էին ներկայացրել, համաձայն որի ուսանողներին չպետք է տրվի տարկետում, այսինքն՝ 18 տարեկանը լրացած արական սեռի ներկայացուցիչները պետք է ծառայեն բանակում, սակայն իշխանությունը հետաձգել է այն:
«Երկու տարի առաջ ներկայացրեցինք նախագիծը և քանի որ թեժ քննարկումներ էին, մեկ տարով հետաձգվեց: Իսկ ապրիլյան դեպքերից ու ՊՆ նախարարի հայտարարությունից հետո իմացանք, որ Կառավարությունն էլ ունի սեփական նախաձեռնությամբ մշակումներ, ուստի որոշվեց քննարկումներ կազմակերպել»,-հայտնեց Թևան Պողոսյանը:
Նրա կարծիքով՝ պետք է հարգանք ունենալ օրենքի հանդեպ՝ լավն է այն, թե՝ ոչ.
«Եթե մարդը կարողացել է օրենքով տարկետում ստանալ, ազատվել բանակում ծառայելու հնարավորությունից, պետք է հարգանքով վերաբերվենք նրանց ունեցած հնարավորություններին և ամեն անգամ չփորձենք դատափետել ու անարգանքի սյունին գամել: Եթե մարդիկ օրինական են արել ամեն ինչ, ապա պետք է հանգիստ վերաբերվենք այս հարցին»,-նկատեց Թևան Պողոսյանը:
Հարցին, թե Թևան Պողոսյանն ինքը ծառայե՞լ է բանակում. Պատասխանեց. «Ոչ։ Ես էլ եմ օգտվել ամեն ինչից օրինական։ Ես Ղարաբաղում եմ եղել պատերազմի ժամանակ, մնացածը դուք գնահատեք»։
Ինչ վերաբերում է կոռուպցիոն ռիսկերից ազատվելուն, պատգամավորը չգիտի, թե ինչպես է պետք ազատվել.եթե հուշեն՝ դեմ չի լինի:
ՀՀԿ խմբակցության պատգամավոր Շիրակ Թորոսյանը հավանություն է տալիս Թևան Պողոսյանի օրենսդրական առաջարկին.
«Մենք տարկետման մասին ընդհանրապես պետք է չխոսենք, բոլորն էլ բանակ պետք էգնան: Իսկ, եթե կան տաղանդներ, չափորոշիչներ պետք է լինեն»,-ասաց ՀՀԿ-ական պատգամավորը:
Անի Կարապետյան
