Die Welt գերմանական պարբերականի սյունակագիր Մարտինա Մայսթերն իր հրապարակած հեղինակային հոդվածում անդրադարձել է   Շառլ Ազնավուրի նոր՝ 51-րդ ալբոմին, որը կոչվում է Encores։ Նոր ձայնասկավառակի մասին խոսելիս Ազնավուրը նշում է, որ չի պատրաստվում ստեղծագործական կարիերայում  դադար տալ։

«Դադա՞ր։ Ինչու՞։ Եթե ես այլեւս բեմ դուրս չգամ, ես իսկույն կմահանամ։ Իսկ ես դեռ երկար ժամանակ նման պլաններ չեմ կազմում»,- ասում է Ազնավուրը։

Իր 91-րդ տարեդարձը նա նշել չի պատրաստվում, ճիշտ այնպես, ինչպես չի նշել 90-ամյակը։ Անցյալ տարի այդ հոբելյանական երեկոն նա անցկացրեց բեմի վրա, իսկ հանդիսատեսը հավաքվել էր կենդանի լեգենդին լսելու համար, շարունակում է հոդվածագիրը։
Նա նկարահանվել է ավելի քան 80 ֆիլմում՝ սկսած Ֆոլկեր Շլյոնդորֆի «Թիթեղյա թմբուկից» մինչեւ Ատոմ Էգոյանի «Արարատը», որտեղ նա խաղում է Հայոց ցեղասպանութան մասին ֆիլմ նկարահանող հոլիվուդյան պրոդյուսերի դեր»,- գրում է հեղինակը եւ հետաքրքիր հարցադրում կատարում Ազնավուրին.
-Դուք համարվում եք աշխարհի ամենահայտնի հայը։ Սակայն Ցեղասպանության 100-ամյակին ձեզ մրցակցություն ստեղծեց այնպիսի աստղ, ինչպիսին Քիմ Քարդաշյանն է։ Դուք մրցակցու՞մ եք նրա հետ։
«Ես մրցակցե՞մ։ Ինչ Հայաստանին է վերաբերում, այնտեղ ես մրցակցությունից դուրս եմ»,- ասում է Ազնավուրը, որը իր հայրենիքի  հետ պայքարում է Ցեղասպանության ճանաչման համար, եւ որը  իր հայրենիքի կողքին էր 1988թ. երկրաշարժի ժամանակ,- գրում է հոդվածագիրը։
«Միայն վշտի  մեջ է մարդ ինքն իրեն գտնում»,- պարզաբանում է Ազնավուրը երկրաշարժի տարիներին Հայաստանին ցուցաբերած իր օգնությունը։

Ազնավուր անունը նշանակում է աշխարհում 180 վաճառված ալբոմ, անուն, որը կապված է Էդիտ Պիաֆի, Լայզա Մինելիի եւ Ոսկե սկավառակների այնպիսի քանակի հետ, որոնց թիվը հիշել պարզապես հնարավոր չէ։ Ազնավուրը գրել եւ կատարել է 1200 երգ, որոնք երգել է 8 լեզուներով։

Խոսելով իր երգերից՝ շանսոնիեն բացատրում է, թե ինչպես է կարողանում ազդել մարդկանց հույզերի վրա։ «Ես գող եմ,- ասում է Ազնավուրը,- ես գողանում եմ ոչ թե իրեր, ոչ թե պատմություններ, այլ մարդկային զգացմունքներ»։
Նա նկատի ունի, իր երգերը, որոնցով նա գերում է մարդկանց սրտերը, գրում է թերթը։

Հոդվածում նշվում է նաև, որ աշխարհահռչակ շանսոնիեն շատ ճանապարհորդություններ է կատարում։ Նա վերջերս է վերադարձել Երեւանից, իսկ դրանից առաջ համերգներ էր տվել Ռուսաստանում։ Առաջիկայում շրջագայություն է պլանավորում Իսպանիայում։ Զուտ հետաքրքրասիրությունից ելնելով՝ նա մեկնել էր Չինաստան եւ Ուզբեկստան։ «Ես այդպես լիցքավորում եմ իմ մարտկոցները, ինչի շնորհիվ  իմ գլուխը միշտ լի է թարմ գաղափարներով»,- պարզաբանում է նա։

Մի քանի տարի առաջ Time-ն ու CNN-ը անցկացրած հարցումների արդյունքում Ազնավուրին ճանաչել էին հարյուրամյակի մշակութային գործիչը։ Նրա անունը առաջ է անցել Ֆրենկ Սենատրայից եւ Էլվիս Փրեսլիից։  «Նա փոքրիկ տաղանդավոր հիմարիկ է»,- այսպես էր անվանում նրան Պիաֆը,- «եւ այդուհանդերձ, ավելի շատ հանճար, քան հիմարիկ»։
«Էդիտը բոլորի հոգին հանում էր, միայն ոչ իմը։ Ինչու՞։ Որովհետեւ ես նրա սիրեկանը չէի եղել, եւ նա ինձ վրա չուներ այդ իշխանությունը»,- հիշում է Ազնավուրը։

Հոդվածն ամբողջությամբ՝ Die Welt գերմանական պարբերականում: