168.am-ը գրում է, որ կայքի տեղեկություններով՝ հայաստանյան տաքսի ծառայություն մատուցող ընկերությունների շրջանում բուռն դժգոհությունների ալիք առաջացրած «Յանդեքս» տաքսի ծառայությունը պատկանում է Սյունիքի մարզպետ Սուրիկ Խաչատրյանին (Լիսկա):

Կայքի  աղբյուրների փոխանցմամբ՝ հենց Ս.Խաչատրյանն է նախաձեռնել նաև Երևանում գազալցակայաններ բացել, որոնք կսպասարկեն միայն «Յանդեքսի» վարորդներին:

Կայքի հետ զրույցում, սակայն, Ս.Խաչատրյանը հերքել է, որ ինքը որևէ առնչություն ունի «Յանդեքս» տաքսի ծառայության և ապագա գազալցակայանների հետ: «Էդ ո՞վ ա որ էդ «Յանդեքս» տաքսին: Առաջին անգամ եմ լսում»,- ասել է  Խաչատրյանը՝ հավելելով, որ ինքն ընդհանրապես տաքսի ծառայություն մատուցող որևէ ընկերություն չունի: Ինչպես հայտնի է, Սուրիկ Խաչատրյանն ակտիվ զբաղվում է գազալցակայանների բիզնեսով և գազալցակայանների բավականին մեծ ցանց ունի: Նրան են պատկանում Գորիսի տարածաշրջանի գազալցակայանները, այդ թվում՝ Գորիսից մոտ 10 կմ հեռավորության վրա գտնվող խոշոր գազալցակայանը: Սյունիքի մարզպետը ևս 2 գազալցակայան ունի Կապանում, նույնքան էլ՝ Սիսիանի տարածաշրջանում:

amimes.com-ը գրել էր, որ արդեն մեկ ամիս է՝ «Յանդեքս» տաքսի ծառայությունը գործում է Երևանում, սակայն այս մեկ ամսվա մեջ ընկերությունը որոշակի փոփոխություններ է կատարել սակագնում և վարորդների հետ համագործակցության պայմաններում: Այսպես՝ եթե ընկերությունը հայկական շուկա մուտք գործեց՝ առաջարկելով անհամեմատ ցածր սակագին առաջին երկու կիլոմետրի համար՝ 100 դրամ, որից հետո յուրաքանչյուր կիլոմետրի համար ուղևորից գանձվում էր 100-ական դրամ, այսօր արդեն առաջին մեկ կիլոմետրից հաճախորդները վճարում են 100 դրամ: Բացի այս, ընկերությունը, եթե առաջին օրերին վարորդներին յուրաքանչյուր պատվերի համար վճարում էր 400 դրամ (անկախ ուղղությունից), այժմ վճարում է 350 դրամ: Նվազեցման գործընթացը շարունակական է լինելու: Լրատվամիջոցին հայտնի է դարձել, որ ընկերությունը պատրաստվում է Երևանի բոլոր վարչական շրջաններում գազալցակայաններ բացել, որոնք կսպասարկեն միայն «Յանդեքս» տաքսի ընկերության հետ համագործակցող վարորդներին:

Նյութը՝ սկզբնաղբյուր կայքում