Արդեն տևական  ժամանակ է  Share4car ընկերությունը ստեղծել է մի համակարգ, որի նպատակը ՀՀ երթևեկությունը, ինչպես նաև միջքաղաքային  տրանսպորտը կարգավորելը, թեթևացնելը և ավելի մատչելի դարձնելն է: Գաղափարը հետևյալն է՝ գտնել միևնույն ճանապարհով գնացող մարդկանց և կապել իրար: 

«Այս գաղափարը մեզ մոտ առաջացել էր 2015 թ. օգոստոսին, սակայն դրա իրականացմանն անցել ենք  հունվար ամսից:  Նախ  շուկան ենք վերլուծել, ապա նաև  կարճ ժամանակահատվածում ստեղծել ենք մեր կայքը: Այս գաղափարի մասին սկսել էինք մտածել դեռ 2013-ին, երբ Երևանում անցկացվում էր free car ակցիան. հենց այդ ժամանակ էլ հասկացանք, թե ինչու այս ամենը չդարձնենք երթևեկելու հիմնական  տարբերակ: Ի վերջո, այսօր էլ  ամեն օր տեսնում ենք, որ կանգառներում տրանստպորտի  սպասող բազմաթիվ  մարդիկ կան:  Նույն մարզերից  եկած ուսանողների համար սա շատ հարմար տարբերակ կարող է լինել, որովհետև այս դեպքում երթևեկելու համար նախատեսված գումարը կկիսվի»,-Asekose.am-ի հետ զրույցում նշեց է  Share4car-ի տնօրեն Միքայել Գալստյանը:

Վերջինս նաև մանրամասնեց, թե ինչպես  պետք է  գրանցվել այս համակարգում.

«Մեքենա ունենալու դեպքում կարող եք գրանցվել մեր համակարգում, ավելացնում եք նոր երթուղի` նշելով, թե որ կետից որ կետ կարող եք տեղափոխել: Կարող եք նաև նշել, թե ինչ հաճախականությամբ  դա կանեք, օրինակ`աշխատանքի եք գնում երկուշաբթիից ուրբաթ օրերին: Վերջում նաև ավելացնում եք, թե այդ ամենի դիմաց որքան գումար կցանկանաք վերցնել Ձեզ միացող մարդուց կամ մարդկանցից: Գումարի սահմանափակում կա դրված, այսինքն` չեք կարող շատ մեծ գումար վերցնել,  թեպետ ամեն ինչ կախված է ճանապարհից: Օրինակ` եղել է դեպք, երբ համակարգում գրանցված մարդը Գյումրի տանելու համար 1000 դրամ է  վերցրել: Նշեմ, որ մեր համակարգը գործում է  Երևանում,  մարզերում, ինչպես նաև` Թբիլիսում, որի դեպքում շատ ավելի մատչելի է ստացվում»:

Հավելենք, որ Share4car-ը ընկերությունը նաև վստահեցնում է, որ իրենք նաև պատասխանատու են անվտանգության համար, այսինքն` նախքան համակարգում գրանցվելը կատարում են ճշտումներ և ստուգումներ` հետագայում խնդիրներից խուսափելու  համար:

Հեղինակ` Լիլիթ Հակոբյան