asparez.am-ը գրում է. Այսօր Գյումրին մեծ շուքով քաղաքի մուտքի մոտ դիմավորեց պարտադիր զինվորական ծառայությունից վերադարձած գյումրեցի, ԼՂՀ ԶՈՒ-ի Մատաղիսում տեղակայված զորամասի մարտկոցի ավագ սերժանտ Շուլի Հակոբյանին: Նա քառօրյա պատերազմի ընթացքում ոչնչացրել է 3 տանկ, աչքի է ընկել արիությամբ ու հայրենասիրությամբ, զինվորն այս սխրանքի համար ՀՀ նախագահի կողմից պարգեւատրվել է «Մարտական խաչ» երկրորդ աստիճանի շքանշանով:
Հերոսին մեծ որգեւորությամբ ընդունեց նաեւ Գյումրու քաղաքապետը. հաշվի առնելով հայրենիքի պաշտպանության գործում ցուցաբերած խիզախությունը, պայքարելու կամքն ու ոգին, անձնական նվիրումն ու արիությունը` գյումրեցի Շուլի Հակոբյանը պարգեւատրվեց համայնքի ոսկե հուշամեդալով:
Շուլին եղել է զորամասի հակատանկային մարտկոցի 1-ին դասակի 1-ին «Ֆագոտ»-ով հաշվարկի հրամանատար եւ ավագ սերժանտ:
Ապրիլյան մարտական գործողությունների ժամանակ նա մոտ 1200մ հեռավորությունից «Ֆագոտ»-ով է խոցել հակառակորդի 3 տանկն էլ` կասեցնելով թշնամու առաջխաղացումը:
-Ես կատարել եմ իմ պարտքը, դա իմ պարտականությունն էր, որը իրականացրել եմ փայլուն՝ հետ եմ մղել թշնամուն, ոչնչացրել եմ նրա երեք տանկը: Դա իմ համար կարեւոր քայլ էր այդ պատերազմական իրավիճակում: Ցավում եմ, որ իմ մարտական շատ ընկերեները այս պահին իմ կողքին չեն, նրանք եւս շատ բան են արել մեր հայրենիքի համար: Մենք մեր ռազմական գործողություններն իրականացրել ենք համախմբված՝հակառակորդին համապատասխան հակահարված տալով:
Նյութը`սկզբնաղբյուր կայքում
