Սիրիական կառավարական զորքերը Ռուսաստանի աջակցությամբ կիրակի օրը հաջողությամբ առաջ են շարժվել դեպի Հալեպի արևելյան հատված՝ նպատակ ունենալով բաժանել ընդդիմադիր ուժերի վերահսկողության տակ գտնվող գոտին:
Ականատեսների վկայությամբ քաղաքացիական ազգաբնակչության մեծ զանգվածը հարձակումից առաջ լքել է թեժ գոտին: Խալիդ Խաթիբ անունով քաղաքացին, ով աշխատում է «Սպիտակ սաղավարտներ» կամավորական, ոչ ռազմական, փրկարար կազմակերպությունում, ասում է, որ արևելյան Հալեպից հազարավոր քաղաքացիներ ապաստան են գտնում կառավարական զորքերի վերահսկողության տակ գտնվող արևմտյան Հալեպում:
Սիրիական պետական զանգվածային լրատվության միջոցները հաղորդում են, որ ռուսական օդուժի օգնությամբ սիրիական կառավարական ուժերը գրավել են Հալեպի կարևոր շրջաններից մեկը և ճեղքել ընդդիմադիրների պաշտպանությունը հյուսիսարևելյան ռազմաճակատում: Ականատեսների վկայությամբ խոսքը գնում է արևելյան Հալեպի Սախուր շրջանի մասին:
Փորձագետների կարծիքով Սախուրի անցումն Ասադին հավատարիմ ուժերի վերահսկողության տակ ռազմական առումով կմեկուսացնի ընդդիմադիրների վերահսկողության տակ գտնվող արևելյան գոտին հյուսիսայի և հարավային գոտիներից և տեսականորեն ծանր կացության մեջ կդնի ընդդիմադիրների ուժերին:
