Բրիտանական հեղինակավոր The Telegraph պարբերականը Հայաստանի Հանրապետության Անկախության 25-րդ տարեդարձի առթիվ ուշագրավ անդրադարձ է կատարել մեր երկրին՝ օտարերկրյա ընթերցողի համար ներկայացնելով 25 տպավորիչ փաստ հայերի և Հայաստանի մասին, որոնցից մի քանիսը ներկայացնում ենք Ձեր ուշադրությանը:
1. Հայերը գինեգործությամբ զբաղվող աշխարհում ամենահին ազգն են
Պարբերականը որպես ասվածի ապացույց է ներկայացնում 2011թ. «Արենի- 1» քարանձավային համալիրում գինեգործության արհեստի ավելի քան 6.000 տարվա պատմություն ունեցող վկայությունների հայտնագործությունը:
2. Հայերը քրիստոնեությունը որպես պետական կրոն ընդունած՝ աշխարհում առաջին ազգն են:
3. Հայաստանը հինավուրց վանքերի ու եկեղեցիների երկիր է
Պարբերականը նկատում է, որ Հայաստանում վանքերն ու եկեղեցիներն այնքան շատ են, որ հնարավոր չէ դրանց շարքում ընտրել լավագույնը:
4. Շախմատը ներառված է հանրակրթական դպրոցների ուսումնական ծրագրում
5.«1915թ. Օսմանյան կայսրությունը կազմակերպել և իրագործել է 1.5 մլն հայերի համակարգված ոչնչացումը, որը հայտնի է որպես «Հայոց ցեղասպանություն»: Թուրքիան՝ Օսմանյան կայսրության իրավահաջորդը, ժխտում է Ցեղասպանության փաստը, սակայն աշխարհի 28 պետությունների կառավարությունները դարասկզբին տեղի ունեցած դեպքերը ճանաչել են որպես ցեղասպանություն»,-գրել է աղբյուրը:
6. Հայաստանի սահմաններից դուրս շատ ավելի հայ է ապրում, քան երկրում
«1915թ. դեպքերը ստիպել են միլիոնավոր հայերի գաղթել արտասահման ու հետագայում այնտեղ խոշոր համայնքներ ստեղծել»,-գրում է պարբերականը՝ հավելելով, որ Հայաստանի սահմաններից դուրս ապրում է մոտ 5.6 մլն հայ:
7. Հայաստանը համաշխարհային ճանաչում ունեցող մի շարք աստղերի՝ Շերի, Անդրե Աղասիի, Սերժ Թանկյանի, Քարդաշյանների պատմական հայրենիքն է:
8. Հայերը հավատում են, որ Նոյյան տապանը հանգրվանել է Արարատ լեռան կատարին՝ չնայած, որ իրականացված բազմաթիվ գիտարշավների արդյունքում տապանն այդպես էլ չի հայտնաբերվել:
9. Հայաստանի ազգային խորհրդանիշներից մեկը Թուրքիայի տարածքում գտնվող Արարատ լեռն է, որը հայերը համարում են սրբազան:
10. Հայաստանն ունի աշխարհի ամենահին մայրաքաղաքներից մեկը` Երևանը, որը հայտնի է վարդագույն քաղաք անվամբ:
Պարբերականը գրում է, որ Երևանը համարվում է աշխարհի ամենահին բնակեցված քաղաքներից մեկը, որը Հռոմից 29 տարով մեծ է:
11. Հայկական կոնյակի անզուգական համը փորձողների թվում է Մեծ Բրիտանիայի նախկին վարչապետ Ուինսթոն Չերչիլը, ում համար ԽՍՀՄ ղեկավար Իոսիֆ Ստալինը Երկրորդ աշխարհամարտի տարիներին մի քանի տասնյակ արկղ հայկական կոնյակ է ուղարկել:
12. Հայ կանայք ամենասեքսուալն են ճանաչվել աշխարհում
ԱՄՆ-ում բնակվող 44.000 տղամարդու շրջանում անցկացված սոցհարցման արդյունքը եղել է ահա այսպիսին: Պարբերականը չի բացառում, որ արդյունքն առավելապես պայմանավորված է հեռուստաաստղ Քիմ Քարդաշյանի ունեցած հաջողությամբ:
13. Հայկական հացը՝ լավաշը, ներառված է ՅՈՒՆԵՍԿՕ-ի ոչ նյութական արժեքների համաշխարհային ժառանգության ցանկում:
