McDonald's ռեստորանների ցանցը Երևանում չի բացվելու:

«Այդ խոսակցությունը չի համապատասխանում իրականությանը: Մենք  Հայաստանում McDonald's  բացելու ծրագրեր չունենք»,-նշել է  Եվրոպայում McDonald's ռեստորանների ցանցի մամլո-քարտուղար  Ջոան դե Քոնինգը`  "Новости-Армения" կայքի հարցմանն ի պատասխան:

Նշենք, որ Երևանում McDonald's ռեստորանների ցանցի բացվելու մասին խոսակցություններն ավելի  էին թեժացել  վերջերս, երբ  վրացի գործարար Թեմուր Չկոնիան նշել էր, որ պատրաստվում է Հայաստանում բացել McDonald's ռեստորանների ցանց։ 

Ըստ գործարարի` այս տարվա ապրիլին Օռլանդոյում (ԱՄՆ, Ֆլորիդա նահանգ) տեղի է  ունենալու McDonald's ընկերության ներկայացուցիչների մեծ հանդիպում, որի ընթացքում կորոշվի արագ սննդի ամենատարածված ռեստորանը Հայաստանում բացել-չբացելու հարցը։

«Կարծում եմ, որ հարցը կլուծվի Հայաստանում McDonald's բացելու օգտին։ Առաջին հերթին շատերը Հայաստանից գալիս են Թբիլիսիի McDonald's, այսինքն` դա պահանջված ֆասթ ֆուդ է հայ բնակչության շրջանում, երկրորդ` ռեստորան կարելի է բացել անգամ 150 հազարից քիչ բնակչություն ունեցող քաղաքներում»,- հայտարարել էր Չկոնիան։

Հավելենք, որ  դեռ  2011-ին մամուլում քննարկվում էր, որ «Տաշիր» ընկերությունը  բանակցություններ է վարում` Հայաստանում  McDonald's բացելու վերաբերյալ:  Նշվում էր, որ առաջին ցանցը  բացվելու էր  «Դալմա Գարդեն Մոլ»-ում: Ավելի ուշ `  «Տաշիր» ընկերության ներկայացուցիչները հայտնեցին, որ  ցանկություն ունեն McDonald's բացել իրենց նոր  հիպերմարկետում` «Ռիո»-ում: