Մայր Աթոռ Սուրբ Էջմիածնի Տեղեկատվական համակարգը հայտարարություն է տարածել. «Տավուշում ընթացող զարգացումների համատեքստում ՀՀ իշխանությունների առանձին ներկայացուցիչներ և նրանց ձայնակցող այլազան անհատներ ստի ու կեղծիքի տարածման միջոցով արշավ են ձեռնարկել Հայ Եկեղեցու, ի մասնավորի Տավուշի թեմի առաջնորդի նկատմամբ, ով հանդես է գալիս հայրենիքի անվտանգության և իր թեմի հավատավոր զավակների իրավունքների պաշտպանության մտահոգությամբ։
Հորդորում ենք դադարեցնել անվայել և պախարակելի գործելաոճը, որը միմիայն անհամերաշխություն և ատելություն է սերմանում անվտանգային սպառնալիքներ դիմագրավող մեր հասարակության մեջ։

***

Տավուշի թեմի առաջնորդ Բագրատ Սրբազանը հանդես եկավ ուղերձով. «Յուրաքանչյուրը թող իր բնակավայրի մոտ իր ընդվզումը հայտնի: Սա ոչ մի դեպքում Ոսկեպարի կամ Կիրանցի հարց չէ: Արդեն ականազերծում են անում և մենք դիտորդի կարգավիճակում ենք, փորձում ենք խանգարել, բայց դա քիչ է: Սա համարեք ճիչ, աղաղակ, մի թաքնվեք ձեր ընտանիքների փափուկ բարձերի տակ, մի ձևացրեք, թե ամեն ինչ կարգին է: Սա նորմալ վիճակ չէ: Այս չարիքի իշխանության հարցը պետք է լուծվի, սա ճշմարտության մասին է, մեր ինքնության մասին է: Եթե սրանք արժեքներ են, ապա պիտի դուրս գաք ու մենք կհասնենք տեղ»: