168.am-ը հարցազրույց ունի դերասան Սերգեյ դանիելյանի հետ: Զրույցից մի հատված ներկայացնում ենք ստորև.
– Պարոն Դանիելյան, ինչպե՞ս եք վերաբերվում Էջմիածին քաղաքում Արամ Ասատրյանի անունով փողոց անվանակոչելու փաստին:
– Դե, ասում են՝ գուսան է, իր անունով փողոց ենք անվանակոչում. ի՞նչ կարող եմ ասել: Ինձ համար բոլոր գուսաններն էլ ռաբիս են, ես այդ երաժշտությունը չեմ սիրում: Կան մի քանի գուսաններ, որոնց գործերը որպես պոեզիա կարող եմ ընդունել, օրինակ՝ Սայաթ-Նովա, Շերամ, Հավասի… մնացածը ռաբիս են. իսկ ռաբիսը միքս երաժշտություն է, ժողովրդին հասու ռեստորանային երաժշտություն: Նույնն էլ Արամ Ասատրյանն է, ինչո՞ւ եք զարմացել:
– Նրա որդին՝ Արտաշ Ասատրյանը, ասել էր. «Գուսան Արամ Ասատրյանն Ազնավուրին, Կոմիտասին, Մոնթեին ոչնչով չի զիջում»: Դուք ի՞նչ կասեք այս մասով:
– Չեմ ուզում արտահայտվել, մարդը հայր է կորցրել, իր համար իր պապան Սայաթ-Նովա էլ է, Հիսուս Քրիստոս էլ է: Թող այդպես էլ մնա իր համար, բայց մենք, իհարկե, գիտենք, որ առանձնապես մի բան չէր: Հիմա նրա անունով փողոց են դնում, ջհանդամ դնեն, դա ի՞նչ է փոխում ինձ համար. ոչինչ:
Առավել մանրամասն` սկզբնաղբյուր կայքում
Հիշեցնենք, որ երեկ Àsekose.am-ի հետ զրույցի ընթացքում Արամ Ասատրյանի որդին` Արտաշ Ասատրյանը, անդրադառնալով այն խոսակցություններին, որոնց համաձայն` չի կարելի նույն հարթության վրա դնել Արամ Ասատրյանին, Շարլ Ազնավուրին, Կոմիտասին, Մոնթեին, Արամ Խաչատրյանին և այլ մեծություններին, ասել էր. «Գուսան հայրս ձեր թվարկածներից որևէ մեկին ոչնչով չի զիջում և որևէ մեկից ոչ մի բանով պակաս չէ: Նա գուսան մարդ է, ինքն իրենով է հասել ու արժանացել ժողովրդի մեծ սիրուն: Հայրս 700 երգի հեղինակ է, 400-ից ավելի հիթեր ունի, որոնք մինչ օրս լսվում են, մինչ օրս շատերի կողմից կատարվում են: Հայրս իր կենդանության օրոք սեր է տվել ժողովրդին, սեր է ստացել ժողովրդից, որը մինչ օրս պահպանվում է, իսկ շատ արվեստագետներ այդ սիրո և երկրպագության պակասն իսկապես ունեն: Արամ Ասատրյանի տիտղոսին դեռ ոչ մեկ չի հասել»:
Կարդացեք նաև` Արամ Ասատրյանին գնահատողների խավից երբեք չեմ եղել ու չեմ էլ լինի. Արթուր Իսպիրյան