Ըստ Asekose.am-ի ընթերցողներից մեկի` Սյունիքի մարզի Խնձորեսկ գյուղում Մարինե Մելիքյանը խաբեություններ է իրականացրել, որոնց զոհն են դարձել նույն գյուղի մի շարք բնակիչներ: Նամակը մակագրված է որպես անպատիժ երևույթ, սակայն ընթերցողը խնդրել է իր անունը չհրապարակել` վախենալով սպառնալիքներից և ճնշումներից: Նամակում մասնավորապես նշվում է հետևյալը.
«Մարինե Հայկի Մելիքյանը 2014թ. Գորիսի տարբեր վարկային կազմակերպություններից ` իր ընտանիքի անդամներով հանդերձ /ամուսին , սկեսուր , տեգրոջ կին/ վերցրել է գյուղատնտեսական վարկեր: Այսքանով չբավարարվելով` Մարինե Մելիքյանն իր այս սև գործին ներգրավվել է նաև համայնքի բնակիչներին և նրանց վստահությունը չարաշահելով` վերցրել է մոտ 120000 /հարյուր քսան հազար/ ԱՄՆ դոլարին համարժեք դրամ: 2015թ մայիսին Մարինե |Մելիքյանը դիմել է փախուստի և մինչ այժմ բնակվում Է Երևանում»:
Բնակիչների բողոքով հարուցվել է քրեական գործ`ՀՀ օրենսգրքի խաբեություն, հափշտակում, շորթում խոշոր չափերի համապատասխան հոդվածներով: Սյունիքի մարզի Ընդհանուր իրավասության դատարանը Մարինե Մելիքյանին ճանաչել է մեղավոր և դատապարտել 5 տարի 9 ամիս ժամկետով: Այս պահին դատավարական փուլն ընթացքի մեջ է, իսկ Մելիքյանը դատարանում տվել է ինքնախոստովանական ցուցմունք: Հավելենք, որ ներկայումս Մարինե Մելիքյանը գտնվում է ազատության մեջ:
Ըստ տեղեկության`Մարինե Մելիքյանը Խնձորեսկի Գիլավյան ընտանիքի հարսն էր: Վերջիններս հրաժարվել են նաև իրենց վերցրած վարկերից և չեն վճարում, թեպետ ֆինանսական խնդիրներ չունեն:
«Մոտ 50 մարդ տուժել է այս ընտանիքի գործունեությունից: ԴԱՀԿ ծառայությունն ըստ օրենքի բռնագանձում է տուժողների անշարժ և շարժական գույքը, ծերության ողորմելի կենսաթոշակը և ուսուցչի չնչին աշխատավարձը: Ահա և մեր արդար, անկախ Հայաստանը, որտեղ չի գործում օրենքը, գործում է ուժը, փողը: Անկախ երկիր, որտեղ մաքառում է Հայը»,-նշել է նամակագիրը:
Այս նույն խնդրով նամակագիրը նաև դիմել է վարչապետին և գլխավոր դատախազին: Նամակները ներկայացնում ենք ստորև:
Asekose.am-ը պատրաստ է հարթակ տրամադրել նաև հակառակ կողմին: