Ակտիվիստ Էդուարդ Հայրումյանի ֆեյսբուքյան գրառումը՝ կից տեսանյութով․ «Արդեն 10 օր է, ինչ բազմաթիվ մարդիկ, իրարից անկախ, իրենց արդարացի բողոքն են արտահայտում Ծիծեռնակաբերդի հուշահամալիրում տեղի ունեցող փնթի կազմակերպված և վանդալիզմ հիշեցնող «վերանորոգման» մասին։
Այդ ընթացքում բազմաթիվ սովորական մարդիկ և պաշտոնյաներ փորձեցին մարդկանց շեղել, և ներկայացնել մեր հիմնավորված պահանջները, որպես «ընդդիմության հերթական շոու»։
Նախ այդ մարդկանց ասեմ, որ ձեր սրտի ընդդիմության որևէ բարձրաստիճան ներկայացուցիչ նույնիսկ մեկ գրառում չարեց այդ մասին (առնվազն ես փնտրել եմ ու չեմ գտել), ավելին՝ հենց ձեր սրտի ընդդիմության ներկայացուցչի կազմակերպությունն է եղել այդ տենդերի միակ մասնակիցն ու շահողը, և իրենք էլ ջարդել են այդ քարերը, որոնք, ըստ պայմանագրի, հնարավորինս անվնաս պետք է հանեին և հետ տեղադրեին։
Եվ ստացվում է, որ իշխանության որոշ ներկայացուցիչներ ստեղծել են «հորինված ընդդիմություն», որպեսզի պաշտպանեն իրենց սրտի ընդդիմությանը։
Բայց այս 10 օրվա ընթացքում, իրական, հողի վրա կանգնած, շնչող ու լոգիկա ունեցող մարդիկ չնահանջեցին ու հասան այն բոլոր արդյունքներին, որոնք դուք հիմա տեսնում եք այս տեսանյութում։
Բայց սրանով չպետք է մխիթարվենք և մեկը ես կշարունակեմ հետևողական լինել մեր երկրի գլխավոր հուշահամալիրներից մեկի վերականգնմանը»։

***

Լրագրող Նաիրի Հոխիկյանի ֆեյսբուքյան գրառումը․ «Ծիծեռնակաբերդի հուշահամալիրի կասկածելի նորոգման աշխատանքները դադարեցվել են բացառապես հանրային ճնշման տակ։ Այնտեղ հիմա ոչ ոք ոչինչ չի անում, միայն շինհրապարակն է կարգի բերվում, վերանայվում են փաստաթղթերը և շինթույլտությունները։
Խնդրի մասին բարձրաձայնեցին Երևանի ավագանու «Մայր Հայաստան» խմբակցության անդամները, հետո բազմաթիվ մարդիկ գնացին Ծիծեռնակաբերդ ու փորձեցին կանխել այդ փնթի և կասկածելի աշխատանքը, ապա բլոգեր Արթուր Չախոյանը փաստաթղթեր պահանջեց ու ապացուցեց, որ նորոգման աշխատանքներն ամենևին էլ փաստաթղթերին համապատասխան չեն արվում։
Դրանից հետո մի շարք լրատվամիջոցներ գործի անցան։ Հանրային աղմուկ բարձրացվեց։
Սա նշանակում է, որ հանրությունը կարող է փոխել, եթե մտածի, որ ինքը կարող է փոխել»։