Փետրվարի 19-ին`ամենայն հայոց բանաստեղծ Հովհաննես Թումանյանի ծննդյան օրը, արդեն մի քանի տարի Հայաստանում նշվում է նաև որպես Գիրք նվիրելու օր։ Մարդիկ միմյանց գրքեր են նվիրում, գրքեր են նվիրաբերվում նաև գրադարաններին, դպրոցներին, մանկատներին: Սրանով փորձ է արվում վերականգնելու գրքի երբեմնի անգերազանցելի նշանակությունը:
Այդ օրն Արամի 42/1 հասցեում գտնվող «Ժան-Պոլ» էքզիստենցյալ սրճարանը և «Նավավար» ձկնալի ըմպելարանն իրենց այցելուներին գրքեր են նվիրվելու՝ միանալով գեղեցիկ նախաձեռնությանը:
«Ժան-Պոլ» էքզիստենցյալ սրճարանում կհիշեցնեն նաև Ժան Պոլ Սարտրի խոսքերը. «Երբ ժողովրդավարությունը վտանգված է, ուրեմն արձակն էլ է վտանգված: Կգա մի օր, երբ գրելը կարգելվի ու այդ ժամանակ հարկավոր կլինի, որպեսզի գրողը զենքը ձեռքն առնի»: «Ժան-Պոլ»-ը , համաձայն լինելով մեծ էքզիստենցիալի վերոնշյալ մտքի հետ, առաջարկում է բոլորին այդ օրն անցկացնել սրճարանում՝ մի ձեռքին վերցնելով գիրք, մյուսին՝ գինի ու խոսել ամեն ինչից` ժողովրդավարությունից մինչև երաժշտություն, մարդուց մինչև Աստված... Յուրաքանչյուր այցելուին այստեղ, բացի ջերմ ու հաճելի մթնոլորտից, սպասում է նաև իր նվեր գիրքը:
Այս նույն նախաձեռնությամբ հանդես է գալիս նաև «Նավավար» ձկնալի ըմպելարանը՝ առաջնորդվելով Ֆրենսիս Բեկոնի հայտնի խոսքերով. «Գրքերը մտքերի նավերն են, որոնք թափառում են ժամանակի ալիքների վրայով և իրենց թանկարժեք բեռը հոգատարությամբ տանում են սերնդից սերունդ»։ «Նավավար»-ը հրավիրում է բոլորին այդ օրը նավարկելու Նավավարի հետ ու ստանալու նվեր գիրքը:
Նշենք, որ «Ժան-Պոլ»-ի ու «Նավավար»-ի անունից գրքեր են ուղղարկվելու նաև ՀԱԵ Շիրակի թեմի առաջնորդարանի գրադարանին:
