Երեկ Արամի 42/1 հասցեում գտնվող «Նավավար» ձկնալի ըմպելարանում տեղի ունեցավ Սոնա Ռուբենյանի և Վահագ Ռաշի «Պար պսակի» երգի և ձայնասկավառակի շնորհանդեսը: Թե ինչ կապ ուներ երգի հետ «Բարև Երևան» խմբակցության ղեկավար Անահիտ Բախշյանը, բացահայտեց հենց ինքը` տիկին Բախշյանը` ներկայացնելով երգի պատմությունը:
Երգն Անահիտ Բախշյանը լսել է երեխա ժամանակ: Նրա մայրն այն երգել է Հալեպում: Ասում է՝ չի հիշում, թե ով է երգի հեղինակը և միշտ երգում էր այն իր երեխաների համար։
«Մահանալուց հետո` 38 տարի առաջ, մայրս եկավ երազիս և ասաց, որ պիտի գնամ Գոհար Գասպարյանին ասեմ` երգի, որ չկորի, Գոհար Գասպարյանի հետ չստացվեց։ Այս գարնանը լսեցի Սոնայի և Վահագի կատարումներից մեկը և հիշեցի մորս պատգամը, և մենք արդեն լսում ենք այս երգը՝ տաղանդավոր երիտասարդների կատարմամբ»։
«Սոնայի հետ լսեցինք այս երգն ու շատ հավանեցինք: Ես բազմաթիվ զուգերգներ եմ ունեցել տարբեր կատարողների հետ, սակայն ամենաշատը մեր ձայներն են իրար համապատասխանում: Չեմ կարող ասել` երգը տեսահոլովակ կունենա, թե ոչ. ժամանակը ցույց կտա»,- մեզ հետ զրույցի ընթացքում նշեց Վահագը:
Գործիքավորումը Վահագ Ռաշինն է, իսկ երգի վերջին երկու տունը գրել է Սոնայի մայրը՝ Արմինե Սարգսյանը։
«Շատ են լինում գեղեցիկ երգերի առաջարկներ, սակայն այս երգն իրոք դիպչել է իմ սրտին, որովհետև տիկին Բախշյանի պատմությունը իմանալով, այս երգը շատ հոգեհարազատ դարձավ. այն ապրեց»,-նշեց Սոնա Ռուբենյանը:
Անահիտ Բախշյանը ցանկանում է, որ հարսանիքների ժամանակ հենց այս երգի հնչյունների ներքո հարսն ու փեսան իրենց առաջին պարը պարեն. «Ես և քույրերս ամունացել ենք այս երգով, ուզում եմ, որ երիտասարդներն էլ լսեն այս երգը, կիսվեն սոցիալական ցանցերում և ինչու չէ, ամուսնանան այս երգով»։
Ներկաներից Ստյոպա Սաֆարյանը կատակով Սոնա Ռուբենյանին և Վահագին ասաց. «Սիլվա Հակոբյանի, Սոնա Շահգելդյանի ու մյուսների հարսանեկան հացը կտրեցիք...»:
Նշենք, որ ձայնասկավառակների վաճառքից գոյացած 200 դոլարը Անահիտ Բախշյանի քույրերը` Հեղինեն և Վարդուհին, եռապատկել են: Ստացված ողջ հասույթը տրամադրվելու է զինհաշմանդամներին:
72157673074375274
