Հռոմի Ֆրանցիսկոս Սրբազան Քահանայապետի հայաստանյան այցին հատկապես անհամբեր են սպասում գյումրեցիները, ովքեր պապին համարում են իրենց քաղաք բոլոր ժամանակներում այցելած ամենահայտնի ու սիրված հյուրը:
Նշենք, որ Հռոմի պապը պատարագ կմատուցի 26 մետր բարձրությամբ բեմից: Գյումրեցիները կատակում են, թե իրենք սովոր էին, որ իրենց հետ վերևից խոսում են իշխանության ներկայացուցիչները ու նաև ավելացնում են, որ Հռոմի պապն, իր բարձրից հնչեցրած աղոթքով, հենց վերևներում եղածներին է դարձի բերելու:
Ի դեպ, ըստ ասեկոսեների, օրերս Գյումրիում մի նորածնի Հռոմ են անվանակոչել` հիշելով հայտնի ու բարի անեկդոտը.
Գյումրեցին ընկերոջն ասում է.
-Թոռ ունենամ, անունը Հռոմ եմ դնելու, որ հենց դուրս գամ փողոց, բոլորն ասեն` Հռոմի պապը եկավ...
Հիշեցնենք, որ Ֆրանցիսկոս պապից առաջ, Հայոց ցեղասպանության 86-րդ տարելիցի տարում՝ 2001 թվականին, Հայաստան եկավ եւ Ծիծեռնակաբերդում աղոթք հնչեցրեց Հռոմի Հովհաննես Պողոս Երկրորդ պապը:
Հեղինակ`
Ա.Գ.
