Թարմացված․ Արիանա Հովսեփյանի մեքենայի հրդեհման նախաձեռնությունը ոմն Մարտին Ամիրխանյանինն է, ով ինքն է այդ մասին խոստովանել ֆեյսբուքյան իր էջում՝ առանց մանրամասնելու, թե որն է նրա` այդչափ վտանգավոր արարքի պատճառը։
Այս մասին գրում է Նյուզպրեսս․am-ն ու հավելում․ «Չանդրադառնանք նրա քերականական սխալներին ու միանգամից նկատենք, որ թեև Մարտինն այդ մասին չի հայտնել, բայց, մեր տեղեկություններով, այս անձը լուրջ սպառնալիք է իր ընտանիքի համար։
Նրա կինը՝ Գ․-ն, մեզ հետ զրույցում պատմեց, որ Մարտինն իր և իր 2 անչափահաս երեխայի կյանքը վեր է ածել դժոխքի։ Ամուսինը գրեթե ամենօրյա ռեժիմով, սկանդալներ է սարքում ու սպառնալիքներ հնչեցնում Գ․-ի և նրա երեխաների նկատմամբ։ Ու որպեսզի չխաթարվի երեխաների հոգեկան աշխարհը, կինը որոշել է ամուսնալուծվել։
Սակայն քանի որ դա ձեռք չի տվել Մարտինին՝ նա սպանությամբ է սպառնացել կնոջն ու փաստաբանի միջոցով տեղեկացրել, որ ամուսնալուծության դեպքում պահանջելու է ունեցվածքը՝ փաստորեն, զրկելով սեփական երեխաներին անշարժ ու շարժական գույքից։ Ի դեպ, տիկնոջ անունով գնված մեքենան Մարտինը, առանց նրան տեղյակ պահելու, գրավադրել է։
Անելանելի վիճակում գտնվող կնոջն էլ փորձել է օգնել Արիանա Հովսեփյանը, ինչին հաջորդել են Մարտին Ամիրխանյանի անպարկեշտ սպառնալիքները (պահպանված են դրանց պատճենները, քանի որ նա դրանք գրառել է անգամ սոցիալական հարթակում)։
Այժմ խնդիրը իրավապահ մարմինների հսկողության տակ է։ Մարտին Ամիրխանյանը կանչվել է ոստիկանություն։
Հաջորդիվ կանդրադառնանք դեպքերի ընթացքի զարգացումներին»։
Հրդեհել են Newspress.am կայքի հիմնադիր-տնօրեն Արիանա Հովսեփյանի ավտոմեքենան:
Ա. Հովսեփյանը նշել է, որ գիտի, թե ով է հրդեհել մեքենան եւ կոչ է անում ՆԳ նախարար Վահե Ղազարյանին ու Քննչական կոմիտեի նախագահ Արգիշտի Քյարամյանին՝ ձերբակալել կատարողին:
Թարմացված․ Այսօր՝ հունվարի 25-ին, արտակարգ դեպք է տեղի ունեցել Երևանում: Ժամը 01:15-ի սահմաններում ՆԳՆ փրկարար ծառայություն ահազանգ է ստացվել, որ Ղազար Փարպեցու փողոցում ավտոմեքենա է այրվում: Ինչպես հայտնում է Գ. Շամշյանը, պարզվել է, որ հրդեհ է բռնկվել կայանված Range Rover Sport մակնիշի ավտոմեքենայում. բարեբախտաբար, տուժածներ չկան: Կան կասկածներ, որ ավտոմեքենան, որը պատկանում է հասարակական գործիչ, NewsPress.am կայքի հիմնադիր տնօրեն Արիաննա Հովսեփյանին, միտումնավոր են հրկիզել։ Կատարվածի վերաբերյալ ՀՀ ՆԳՆ ոստիկանության Կենտրոնականի բաժնում փաստաթղթեր են ձևակերպվում։ |