Ոմանց համար հարցական է, թե պաշտպանության նախարար Վիգեն Սարգսյանի համար զգայուն այս շրջանում ինչպես նրա ղեկավարած գերատեսչության կարևոր և նախընտրական շրջանում նաև նախարարի քարոզչությունն ապահովելուն միտված վարչության պետի պաշտոնը վստահվեց Գևորգ Ալթունյանին:
Հիշեցնենք, որ ակնհայտորեն վերջինիս աշխատանքից իշխանությունների դժգոհությունն է եղել պատճառը, որ աննպատակահարմար են համարել նրա հետագա պաշտոնավարումն իբրև Հայաստանի հանրային հեռուստաընկերության լրատվական և վերլուծական հաղորդումների տնօրեն:
Դժգոհություններից մեկն էլ եղել է տեղեկությունն այն մասին, որ Ալթունյանը բավականին ուշ է ներկայանում աշխատանքի և շատ պասիվ է ներգրավվում ստեղծագործական աշխատանքներում:
Ըստ ասեկոսեների, երկար տարիներ «թիմ»-ի անդամ եղած Գևորգ Ալթունյանին համակարգում պահելու որոշումն ընդունելուց առաջ՝ նրան խորհուրդ է տրվել նոր աշխատանքում ավելի զգոն ու նախաձեռնող լինել և ամենակարևորը՝ աշխատանքի ներկայանալ վաղ առավոտյան:
Ի դեպ, Գևորգ Ալթունյանին առաջարկվել է ղեկավարել կամ կառավարության տեղեկատվության և հասարակայնության հետ կապերի վարչությունը, կամ՝ ՊՆ համապատասխան վարչությունը. Ալթունյանն ընտրել է վերջինը և երեկվանից ժամանակավոր պաշտոնակատար է:
Նշենք նաև, որ ՊՆ-ում ծանր հրետանի շարունակում են համարել նախարարի մամուլի խոսնակ Արծրուն Հովհաննիսյանին:
Հեղինակ՝
Ա.Մաթևոսյան