Այս նյութը գրելու միտքն առաջացավ Asekose.am-ի հասցեին ստացված մի հուզիչ նամակով, որի հեղինակը ներկայացնում էր իր որդուն «կյանք պարգևելու» պատմությունն ու «Նվիրիր կյանք» բարեգործական հիմնադրամի հոգաբարձուների խորհրդի պատվավոր նախագահ Ռիտա Սարգսյանին անվանում՝ «Կին՝ գարունը սրտում»:
Այնպես որ՝ առաջարկում ենք հրապարակումն էլ ընդունել իբրև լրագրողի գարնանային անկեղծություն:
Այսօր Ռիտա Սարգսյանը նշում է ծննդյան տարեդարձը:
Վստահ եմ, որ նրան այսօր բազում շնորհավորանքներ են հղելու:
Նաև հուսով եմ, որ նրանք, ովքեր տարբեր՝ կամ քաղաքական հայացքների, կամ պարզապես հնարարավորության բացակայության պատճառներով չեն շնորհավորելու Ռիտա Սարգսյանին, անթաքույց շարունակելու են հիանալ նրա կերպարով, որ կարողանում է բարություն տարածել, ինչը ոմանք ընկալում են, ոմանք մերժում, ոմանք էլ անտեսում...
Երկրի ղեկավարին կարելի է քաղաքական գործունեության ու տնտեսական խնդիրների առումով քննադատել, հակառակվել,փնովել, սակայն Առաջին Տիկնոջը, ով, անկախ կարգավիճակից, իրեն բնորոշ լավատեսությունն, ուրախությունն ու կենսախնդությունը փորձում է տարածել հայ բոլոր կանանց շրջանում, չգնահատելը սխալ է:
Ռիտա Սարգսյանը, նախ և առաջ ընտանիքի մարդ է՝ մայր, կին, տատիկ, ապա նոր` երկրի ղեկավարի կին:
Իսկ մայրը, կինն ու տատիկը առաջին հերթին ցանկանում են, որ խաղաղ լինեն երկրի սահմանները, հնարավորին հաշտ՝ ներքին հակառակորդները, հանդուրժող ու բարյացակամ ` միմյանց քննադատողները...
Մի առիթով, ռուսական հեռուստաընկերություններից մեկին տված հարցազրույցում, Ռիտա Սարգսյանն ասել էր, որ մարդու մեջ գնահատում է առաքինությունը, կարգուկանոնն ու բարյացակամությունը:
Հենց այդ երեք կարևոր հատկանիշների համար են,թերևս, մարդիկ գնահատում իրեն՝ Ռիտա Սարգսյանին, որ հանրության առաջ ներկայանում է այնպիսին, ինչպիսին որ կա՝ չի կեղծում ոչ իր ժպիտը, ոչ խոսքը, ոչ էլ միտքը...
Այո, անկեղծ է Ռիտա Սարգսյանն ու անկեղծ նվիրումով էլ ցանկանում է, որ կենսախնդությունն ու լավատեսությունը մտնեն հայկական յուրաքանչյուր ընտանիք, որոնց օգնում է մի քանի բարեգործական հիմնադրամների միջոցով:
Դրանցից մեկն, ի դեպ, պայքարում է ուռուցքային հիվանդություն ունեցող երեխաների մահվան դեմ, մյուսն ՝ օգնում է երեխազուրկ ընտանիքներին՝ զգալ մայրության, ծնող լինելու բերկրանքը:
Հարյուրավոր հայ ընտանիքներ այդ նախաձեռնությունների միջոցով այսօր ժպտում են ու իրենց սրտերում վայելում գարունը...
Գարուն, որ նաև մեր սրտերում է:
Հեղինակ՝
Անահիտ Հարությունյան
