Արդեն տեղեկացրել ենք, որ այսօր «Հայկական ժամանակ» օրաթերթը գրել էր, թե ՀՀ վարչապետ Կարեն Կարապետյանը պաշտոնը ստանձնելուց հետո դեռ չի տեղափոխվել վարչապետի համար նախատեսված կառավարական առանձնատուն և շարունակում է բնակվել Մոնումենտում գտնվող իր առանձնատանը:
ՀՀ բարձրաստիճան պաշտոնյաներից ՀՀ նախագահը, ԱԺ նախագահը, վարչապետը, ինչպես նաև պաշտպանության նախարարը, Սահմանադրական դատարանի նախագահը, Ազգային անվտանգության խորհրդի քարտուղարը կարող են ապրել այդ առանձնատներում: Սակայն այս պաշտոնյաներից ոչ բոլորն են այնտեղ ապրում:
Ըստ օրաթերթի՝ ԱԺ նախագահ Գալուստ Սահակյանն, օրինակ, իր տնից չի տեղափոխվել: Նույն կերպ ՀՀ ոչ բոլոր վարչապետներ են կառավարական առանձնատուն տեղափոխվում: Օրինակ, Տիգրան Սարգսյանն այնտեղ էր ապրում, մինչդեռ Հովիկ Աբրահամյանն իր վարչապետության 2,5 տարիներին ապրում էր Ազատության պողոտայում գտնվող իր շքեղ առանձնատանը:
Ի շարունակություն մամուլի հրապարակման՝ Թերթ.am-ի հետ զրույցում, վարչապետի խորհրդական Շուշան Սարդարյանը` անդրադառնալով օրաթերթի այդ հրապարակմանը, ասել է, որ Կարեն Կարապետյանը չի տեղափոխվելու կառավարական առանձնատուն, ապրելու է Արաբկիր համայնքում գտնվող իր տանը:
Ի դեպ, Շուշան Սարդարյանն այնպես է ասում «Արաբկիր համայնքում գտնվող իր տանը», կարծես, խոսքը բազմաբնակարան շենքի երկու կամ երեք սենյականոց բնակարանի մասին է, ոչ թե ճոխ ու մեծ առանձնատան, որը նույնպես գտնվում է Մոնումենտում՝ ճիշտ եւ ճիշտ Հովիկ Աբրահամյանի առանձնատան կողքին և ոչնչով չի զիջում դրանց՝ ոչ չափերով, ոչ ճոխությամբ, ոչ արժեքով։
Կարեն Կարապետյանի այս առանձնատունն, ի դեպ, ըստ անշարժ գույքի մասնագետների, մի քանի միլիոն դոլար է:
Բա ոնց սրանից հետո՝ ոչ բարի, ոչ էլ ՝ առավել ևս չար նախանձով, չասես՝ Ես էլ «Արաբկիր համայնքում գտնվող» այս տնից չէի տեղափոխվի...
Հեղինակ՝
Ա.Մաթևոսյան
