«Ինձ համար շատ խորհրդանշական էր, որ այդ կոչմանն արժանացա հենց ՀՀ անկախության հռչակման 25-ամյակին: Այդ օրն ինձ համար կարևոր էր նույնքան, որքան ծննդյանս օրը»,-Asekose.am-ի հետ զրույցի ընթացքում ասաց նկարիչ Արմեն Վահրամյանը, ով Սեպտեմբերի 21-ին արժանացել է ՀՀ վաստակավոր նկարչի կոչման:
Շուրջ 30 տարի նկարչությամբ զբաղվող Արմեն Վահրամյանը, ով պարգևատրումից միայն 3 օր առաջ է իմացել այդ մասին ու անակնկալի եկել, կարևորում է պարգևներն ու կոչումները, սակայն առաջնահերթը նկարչի համար գնահատված լինելու զգացողություն ունենալն է:
«Կարևոր է նրանով, որ բարձրանում է պատասխանատվության զգացումը, դու արդեն գիտես, որ տեսադաշտում ես, քանի որ վաստակավոր լինելը բոլոր նկարիչներին չի տրված: Այս ամենով հանդերձ, սակայն, ես ինձ երբեք չեմ համարում մյուս նկարիչներից ավելի պատվավոր, քանի որ բոլորս էլ նույն շնորհով ենք ծնվել: Յուրաքանչյուր նկարիչ արդեն իսկ շնորհալի է, քանի որ Աստված իրեն տվել է արարելու պարգևը. նկարիչն էլ մի արարիչ է: Մեր պարգևը տրված է ի վերուստ, իսկ պարգևը զարդարում է մեր կուրծքը: Պարգևներն այնքանով են կարևոր, որ զգում ու հասկանում ես, որ գնահատված ես: Շնորհակալ եմ բոլոր այն մարդկանց, ովքեր կարողացան տեսնել ու գնահատել թե՛ ինձ, թե՛ իմ կատարած աշխատանքը: Այն շնորհավորանքները, որոնք ստանումե սքեզ լիցքավորում են, թերեն են տալիս»,- մեզ հետ զրույցի ընթացքում պատմեց Արմեն Վահրամյանը, ապա հավելեց.
«Այս կյանքում ամեն ինչ բումերանգի է նման: Ֆիզիկոսներն ու մաթեմատիկոսներն են ասում, որ նույնիսկ կա լազերային ճառագայթի գիտություն, ըստ որի՝ եթե մի հայելու մեջ արևի ճառագայթ ես գցում, այն անդրադարձվում է մյուսի մեջ, և ստացվում է հզոր էներգիա, որը կարող է անգամ պատը ծակել: Կյանքում էլ է այդպես. երբ մենք մարդկանց մի բան ենք կամենում, եթե անում ենք մի լավ բան, դա բումերանգի նման վերադառնում է մեզ՝ բազմապատկված: Թող անհամեստություն չհնչի, բայց թերևս իմ մարդասիրությունն է, որն առաջնահերթ գնահատվում է»:
Զրույցի ընմթացքում Արմեն Վահրամյանը հուզմունքով նկատեց, որ այդ կոչումն առաջնահերթ ուրախացրել է տարեց ծնողներին. «Ամենամեծ ուրախությունը, թերևս, հայրս ապրեց: Երբ հայտնեցի այդ լուրը նրան, նա ասաց, որ մի քանի տարով երկարեց իր կյանքը»:
Հեղինակ՝ Լիլիթ Նավասարդյան
Լուսանկարները՝ Արմեն Վահրամյանի պաշտոնական կայքից
Կարդացեք նաև՝ Արմեն Վահրամյանը բացահայտում է, թե ինչպես է լավ նկարը հանցագործին լավ մարդ դարձնում
Դա երբեք էլ ինձ համար PR-ի տարբերակ չի եղել. Արմեն Վահրամյանն անկեղծանում է
