Երևանի Շենգավիթ վարչական շրջանի ընդհանուր իրավասության առաջին ատյանի դատարանում այսօր կայացավ Նունե Սիմոնյանն ընդդեմ «ԱՐ» հեռուստաընկերության առաջին դատական նիստը։

Ըստ դատարանում ներկայացված նյութերի` «ԱՐ» հեռուստաընկերության սեփականատերը 2014 թվականի փետրվարին Նունե Սիմոնյանին` որպես լավագույն աշխատողի, 8 միլիոն ՀՀ դրամի փոխառություն է տրամադրել «Գրանդ Հոլդինգի» կազմի մեջ մտնող «Հոնդա սերվիս» ընկերությունից ավտոմեքենա ձեռք բերելու համար:

Մեկ տարի անց, սակայն, սեփականատերը պահանջել է վերադարձնել ավտոմեքենան, հրաժարվել դրա դիմաց իր աշխատավարձից ամեն ամիս վճարված ընդհանուր 2.5 մլն դրամից և աշխատանքից ազատվելու դիմում գրել։

«Ես հարց եմ տալիս` ի՞նչ կապ ունեն իմ աշխատանքային որակները ավտոմեքենայի հետ, ասում են` մեքենան դու վատ ես պահել, «Գրանդ հոլդինգի» սեփականատերը` Կարեն Վարդանյանը, քեզանից վիրավորված է և դրա համար ասում է` դիմում գրի, դուրս արի»,- պատմում է հեռուստալրագրողն ու հավելում, որ հրաժարվել է կատարել տնօրենի պահանջը։

Արդյունքում տնօրենի հրամանով նրա նկատմամբ կիրառվել է «նկատողություն» կարգապահական տույժ, իսկ մեկ օր անց` 2016թ.-ի փետրվարի 19-ին, աշխատանքային պայմանագիրը լուծվել է։

Նունե Սիմոնյանը դատական կարգով պահանջում է անվավեր ճանաչել իրեն աշխատանքից հեռացնելու հրամանը, վերականգնել իրեն նախկին աշխատանքում և հարկադիր պարապուրդի համար միջին աշխատավարձի չափով գումար բռնագանձել գործատուից։ Հեռուստալրագրողն այսօր դատարանին որպես լրացուցիչ ապացույց հանձնեց նաև իր և հեռուստաընկերության տնօրեն Արամ Ղազարյանի զրույցի ձայնագրությունը, որտեղ տնօրենն իրենից պահանջում է վերադարձնել փոխառությամբ գնված ավտոմեքենան։

Հեռուստաընկերության սեփականատիրոջ իրավաբան Գագիկ Խաչատրյանը դատարանում հայտարարեց, որ Նունե Սիմոնյանին աշխատանքից հեռացնելու միակ պատճառը նրա աշխատանքային պարտականությունների մեջ թերանալն է, և որ ավտոմեքենայի հետ կապված խնդիրը նրա հեռացման հետ ոչ մի կապ չունի։

«Երբ ինքը ներկայացրել է նյութը, լրատվության բաժնի պետի տեղակալը դժգոհ է եղել, բնական է` պետք է ասեր, թե ինչն է թերի եղել, ինքն էլ թող բարի լիներ, վերացներ։ Այստեղ դա դարձնել հայկական հարց, կռվի թեմա, ինձ թվում է` միանշանակ ճիշտ չէ»,- ասաց պատասխանող կողմի ներկայացուցիչը` վստահեցնելով, որ եթե աշխատանքային խնդիրը հարթվեր վերադասի պահանջին համապատասխան, ապա Նունե Սիմոնյանին աշխատանքից չէին հեռացնի։

Լրագրողը, սակայն, այս հարցի վերաբերյալ սեփական տեսակետն ունի և կարծում է, որ իրեն հեռացրել են բոլորովին այլ պատճառով։

«Իրականում պատճառն այն է, որ լուրերի տնօրեն Ալիկ Հակոբյանը մեկնում է մշտական բնակության Կանադա, և արդեն իսկ որոշված է, որ նրան փոխարինելու է նրա տեղակալը` Եվա Մեհրաբյանը։ Բայց քանի որ կոլեկտիվում դժգոհություններ կային և կոլեկտիվն այնքան էլ չէր ողջունում նրա նշանակումը, քանի որ ես կոլեկտիվում ես մի քիչ ավելի կշիռ ունեմ` և՛ որպես ավելի փորձառու, և՛ որպես տարիքով ավելի ավագ, իրենց մտավախությունը հետևյալն էր, որ ես բունտ կկազմակերպեմ և կձախողեմ «Ազդարար» լրատվականի գործունեությունը` Եվա Մեհրաբյանի տնօրինության օրոք»,- աշխատանքից ազատվելու իր վարկածը ներկայացրեց Նունե Սիմոնյանը։

Ինչ վերաբերում է ավտոմեքենան հետ վերցնելուն, ապա ըստ լրագրողի ունեցած տեղեկությունների` «Գրանդ Քենդին» իր գործունեությունն այնքան էլ երկար չի շարունակելու։ Իսկ քանի որ իր հետ կնքված փոխառության պայմանագրի ժամկետն ավարտվում է 2020թ.-ին, ապա սեփականատերը որոշել է այսպիսով իրեն ապահովել հնարավոր ռիսկերից։ Ի դեպ, ըստ լրագրողի`ինքը միակը չէ, ում նկատմամբ նման խարդախություն է կատարվել, բայց միակն է, ով որոշել է պայքարել իր իրավունքների համար։

Նյութը՝ սկզբնաղբյուր կայքում