Արցախից Հայաստան հատուկ ջոկատային կամ բանակի որևէ ստորաբաժանում չի եկել, և որևէ տարածքի հանձնում չկա:
Այս մասին tert.am-ի հետ զրույցում ասել է ԼՂՀ նախագահի մամուլի խոսնակ Դավիթ Բաբայանը, մեկնաբանելով «Հիմնադիր խորհրդարանի» տարածած հաղորդագրությունը:
«Երկու տեղեկություններն էլ անհեթեթություն են և չեն համապատասխանում իրականությանը: Որևէ մեկը Արցախից Հայաստան չի եկել, լինի հատուկ ջոկատային, բանակի ստորաբաժանումներ կամ այլ զինված անձ: Մենք ունենք սահման, որին թշնամին ամեն օր սպառնում է, իսկ մեր զինված ուժերը հսկում են մեր սահմանները: Ինչ վերաբերում է տարածքների հանձման մասին տեղեկությանը, ապա տարածքի հանձնում չկա: Բավական է: Այդ թեման անընդհատ շահարկվում է,իսկ նման բան գոյություն չունի»,-ասաց Դավիթ Բաբայանը:
Հիշեցնենք, որ «Հիմնադիր խորհրդարանը» ժամեր առաջ հայտարարություն էր տարածել, թե տեղեկություններ են ստացել ՊՊԾ գնդի գրավման նպատակով Արցախից երկու մեքենայով հատուկ ջոկատայիններ բերելու մասին և այդ քայլով փորձ է արվում տարածքները հանձնելուց առաջ իրար հակադրել Արցախն ու Հայաստանի Հանրապետությունը։
