Այս տարվա ապրիլ ամսին տեղի կունենա «Օրանժ Արմենիա» բրենդի փոփոխություն. «Օրանժի» բաժանորդները կդառնան «Յուքոմ»-ի բաժանորդ: Այս մասին այսօր «Յուքոմ» ընկերության մամուլի սրահում հայտարարեց «Յուքոմ» ընկերության մարքետինգի և հաղորդակցության տնօրեն Տիգրան Սաֆարյանը: «Մեզ համար մեծ մարտահրավեր է այդպիսի աշխարհահռչակ ընկերության բրենդի վերափոխում կատարելը: Ապրիլի ընթացքում փոփոխություններն իրականացվելու են, և մենք շարժվելու ենք «Յուքոմ» ապրանքանիշի ներքո»,- ասաց Տիգրան Սաֆարյանը:
«Յուքոմ» ընկերության կոմերցիոն տնօրեն Արամ Բարսեղյանն էլ նշեց, որ «Յուքոմը» շուտով կունենա նորովի ներկայացված սպասարկման սրահներ, որոնք կլինեն մոտ 80-ը, որտեղ հնարավորություն կլինի օգտվել թե՛ «Յուքոմ»-ի, թե՛ «Օրանժ»-ի տրամադրած ծառայություններից:
«Յուքոմ» ընկերության տնօրեն Հայկ Եսայանն էլ պարզաբանեց, որ «Օրանժի» հաճախորդների համար նոր պայմանագրեր կնքելու անհրաժեշտություն չի առաջանա «Յուքոմի» հետ, քանի որ «Յուքոմը» հանդիսանում է «Օրանժ»-ի իրավահաջորդը:
