Ողբերգական վթար Երևանում: Այսօր՝ օգոստոսի 26-ին ժամը 00:55-ին «911» ծառայությանն ահազանգ է ստացվել, որ Երևան քաղաքի Մյասնիկյան պողոտայի «Բելաջիո» ռեստորանային և հյուրանոցային համալիրի մոտակայքում այրվում է ավտոմեքենա, ներսում քաղաքացի կա: Այս մասին տեղեկանում ենք ՀՀ ԱԻՆ մամուլի ծառայությունից:
Դեպքի վայր են մեկնել ՀՀ ԱԻՆ ՓԾ հրշեջ-փրկարարական ջոկատից երեք մարտական հաշվարկ և հատուկ նշանակության փրկարարական աշխատանքների իրականացման կենտրոնի փրկարարական ջոկատը:
Պարզվել է, որ «Իբիցա» հյուրանոցային համալիրի մոտակայքում Mercedes C class մակնիշի դուրս է եկել երթևեկելի գոտուց, բախվել ծառին և բռնկվել: Հրդեհը մեկուսացվել է ժամը 01:09-ին, մարվել՝ 01:12-ին:
Այրվել են ավտոմեքենայի սրահն ու շարժիչի հատվածը՝ ամբողջությամբ. ավտոմեքենայում հայտնաբերվել է վարորդի դին (ինքնությունը չի հաջողվել պարզել):
Փրկարարները հոսանքազրկել են ավտոմեքենան, փակել գազի բալոնի փականը և սահմանազատել տարածքը: Փրկարարներն ավտոմեքենայից դուրս են բերել դին և պատգարակով մոտեցրել շտապօգնության ավտոմեքենային:
