Հունվարի 12-ին Գյումրի քաղաքում Ավետիսյանների ընտանիքի յոթ անդամների սպանության գործով փորձագետների կողմից ստացված դատաձգաբանական, դատակենսաբանական եզրակացություններին այսօր՝ լրագրողների հետ հանդիպման ժամանակ անդրադարձան տուժողների իրավահաջորդների ներկայացուցիչներ` փաստաբաններ Լուսինե Սահակյանը, Երվանդ Վարոսյանը և Երեմ Սարգսյանը:
Լուսինե Սահակյանի խոսքով՝ կրակոցներն արձակվել են հրազենից, որը հայտնաբերվել է դեպքի վայրում և պատկանում է Գյումրիում տեղակայված ՌԴ 102-րդ ռազմաբազայի զինվոր Վալերի Պերմյակովին:
Դատակենսաբաննների կողմից արված եզրակացության համաձայն՝ Պերմյակովի քրտինքը համընկել է հագուստի, կոշիկի վրա եղած քրտինքին:
«Սակայն, դեռևս չենք կարող ասել՝ հագուստը նրանն է, թե ոչ, դա ցույց կտա դատագենետիկական փորձաքննությունը»,-ասաց Լուսինե Սահակյանը:
Փաստաբաները նշեցին, որ միջնորդություն է ներկայացվել՝ Ավետիսյանների հեռախոսների խոսակցությունները վերծանելու համար: Իսկ սվին-դանակի վրա հայտնաբերված արյան հետքերը համընկել են փոքրիկ Սերյոժայի արյան հետ:
Անի Կարապերյան
