ԱԺ հերթական նիստին հաստատման է ներկայացվել նաև ՀՌՀ նախագահի և անդամների աշխատավարձի բարձրացմանն ուղղված նախագիծը, որի քննարկման ժամանակ «Հայաստան» խմբակցության պատգամավոր Լիլիթ Գալստյանը, ի նկատի ունենալով ՀՌՀ նախագահ Տիգրան Հակոբյանին, հարց ուղղեց պետաիրավական հարցերի հանձնաժողովի նախագահ Վլադիմիր Վարդանյանին, թե արդյո՞ք կոռեկտ է, որ սահմանադրական անկախ կարգավիճակ ունեցող մարմնի նախագահը, որը պետք է ապահովի քաղաքական չեզոքություն, Հանրային հեռուստաընկերության տիրույթում քաղաքական հաղորդում է վարում ու գնահատականներ հնչեցնում։
«Հարցի հասցեատերը ես չեմ, պետք է առաջարկեմ Հեռուստատեսության և ռադիոյի հանձնաժողովի տարեկան հաղորդումը ներկայացնելու պարագայում այդ հարցն ուղղել նախագահին, ես չեմ կարող գնահատել կոնկրետ մարդկանց վարքագիծը»,- պատասխանեց Վլադիմիր Վարդանյանը։ Լիլիթ Գալստյանի այն դիտարկմանը, որ ԱԺ-ն ունի վերահսկողական գործառույթներ և պետաիրավական հարցերի հանձնաժողովին պետք է մտահոգի այս հարցը, Վարդանյանը պատասխանեց, որ կուսումնասիրվի՝ արդյո՞ք օրենսդրական արգելք կա այդ հաղորդումը վարելու համար, թե՞ ոչ։