Asekose.am-ին հայտնի է դարձել, որ քննարկվում է «Լայմ» հեռուստաընկերության փոխարեն առաջիկայում իր աշխատանքները սկսող և Հանրապետական կուսակցությանը սպասարկող հեռուստաալիքի լրատվական ծրագիրը «Հայլուր» անվանակոչելու տարբերակը:
Հիշեցնենք, որ Լևոն Տեր-Պետրոսյանի նախագահության վերջին տարիներին նույն անվանումն ուներ Ազգային հեռուստատեսության ալտերնատիվ լրատվական ծրագիրը, որը եթեր էր հեռարձակվում շաբաթը մեկ, իսկ աղկահարույց մի թողարկումից հետո՝ ընդհանրապես փակվեց:
Իսկ արդեն երկրի գլխավոր լրատվական ծրագիրն անվանակոչվեց «Հայլուր», երբ սկսվեց Ռոբերտ Քոչարյանի նախագահության ժամանակաշրջանը:
Հիշեցնենք նաև, որ ըստ նախնական տեղեկությունների ՀՀԿ-ի հեռուստաալիքը կոչվելու էր «Հայրենիք», հետո շրջանառության մեջ դրվեց «Հայք» անվանումը, իսկ բոլորովին վերջերս մամուլում գրվեց, թե կուսակցությունը որոշել է հեռուստաընկերությունը կոչել «Արարատ» անվամբ:
Հարկ է նշել, որ ինչպես «Հայլուր» անվանումն , այնպես էլ մյուսները՝ հեռուստատեսության ու լրատվության ոլորտում օգտագործված ու պատկանելություն ունեցող անուններ են:
«Հայրենիք»-ը մանկական հեռուստաընկերություն էր, որ պատկանում էր Վարդանյանների ընտանիքին ու փակվեց մոտ 5 տարի առաջ, իսկ «Հայք»-ն էլ՝ ՀՀՇ-ի պաշտոնաթերթն էր: «Արարատ» անվանումն էլ հատկապես վերջին տարվա ընթացքում ՝ լրատվական դաշտում ասոցացվում է համանուն ամսագրի ու araratnews կայքի հետ:
Դե իսկ ինչ վերաբերում է «Հայլուր»-ին, որից այդքան հեշտությամբ հրաժարվեցին Հանրային հեռուստաընկերությունում՝ Ռուբեն Ջաղինյանի ու նրա թիմի գալուստից հետո, պետք է նշել, որ անունն, անկախ դրա մասին ձևավորված որոշ ընդդիմադիր շրջանակների բացասական կարծիքից, իրոք, լրատվական իմիջ ու պատմություն ունի, մնում է, որ Հանրապետականն այն ճիշտ օգտագործի...