Քաղաքագետ Արա Պողոսյանի ֆեյսբուքյան գրառումը․ «Մի քանի շաբաթ Հայաստանի իշխանությունների դառմայեդ «փորձագետներն ու քաղաքական վերլուծաբանները» Հայաստանի հանրության մոտ բրյուսելյան հանդիպման նկատմամբ չարդարացված սպասելիքներ ձևավորեցին, որը հայ ժողովրդի նկատմամբ իսկական դավադրություն է, որովհետև օբյեկտիվ և սուբյեկտիվ պատճառներով այսօրվա Բրյուսելում ՀՀ-ԵՄ-ԱՄՆ եռակողմ հանդիպման շուրջ ձևավորված հանրային սպասելիքները չեն արդարանալու, ինչը բերելու է Հայաստանում նոր հիասթափություն, և եթե այսօր հասարակության մոտ հիասթափություն կա Ռուսաստանի նկատմամբ, ապա վաղը նույնը ու դեռ ավելի բացասական երանգներով լինելու է Արևմուտքի նկատմամբ։
Ատել բոլորին, չվստահել բոլորին, նշանակում է կորցնել հույսը ապագայի նկատմամբ և պարփակվել ու մեկուսանալ աշխարհից (եթե իհարկե թույլ տան)»:

***

ԱՄՆ պետքարտուղար Էնթոնի Բլինքենը X-ի իր միկրոբլոգում անդրադարձել է Հայաստանի վարչապետ Նիկոլ Փաշինյանի և Եվրոպական հանձնաժողովի նախագահ Ուրսուլա Ֆոն դեր Լեյենի հետ հանդիպմանը, որը կայացել է Բրյուսելում։ «ԱՄՆ-ն շարունակում է հաստատակամ մնալ՝ օգնելու Հայաստանին ժողովրդավարության ամրապնդման և տարածաշրջանային ինտեգրման միջոցով տնտեսական բարգավաճման ու կայունության հասնելու հարցում: Հայաստանի և ԵՄ առաջնորդների հետ հանդիպմանը ես հայտարարել եմ այդ նպատակների համար ավելի քան 65 միլիոն դոլար հատկացնելու մեր հանձնառության մասին»,- գրել է Բլինքենը։

Հիշեցնենք՝ Բրյուսելում կայացած եռակողմ հանդիպման մեկնարկից առաջ Փաշինյանը հանդիպում էր ունեցել ԱՄՆ Միջազգային զարգացման գործակալության ղեկավար Սամանթա Փաուերի հետ։

***

Բրյուսելում կայացած հանդիպումից առաջ հայկական պատվիրակությունը եվրոպացի և ամերիկացի դիվանագետներին է փոխանցել փաստաթղթեր, որոնք վկայում են Իսրայելից և Պակիստանից դեպի Ադրբեջան սպառազինությունների լայնածավալ մատակարարումների մասին, հայտնում է Politico-ն:

Կայքը նշում է, որ իրենց հաջողվել է ծանոթանալ այդ թղթերին, որոնցով հայկական կողմը հայտնում է, որ այս տարվա սկզբից Ադրբեջանը միջինում օրական ստանում է սպառազինության մեկ խմբաքանակ: Հայաստանը նաև ներկայացրել է, որ սեպտեմբերին Ադրբեջանը ռազմական գործողություն է սկսել Լեռնային Ղարաբաղը գրավելու համար, ինչը հանգեցրել է 100 000 հայերի զանգվածային բռնագաղթի: